– Trakassering av ferjemannskap er eit stort problem
Kvar dag vert ferjemannskap rundt omkring i landet trakasserte av reisande. Både i form av utskjelling og påkøyrsler. No har Statens vegvesen laga ein haldningskampanje.
Publisert
Statens vegvesen skriv på heimesida at dagleg har ferjemannskap mindre hyggelege opplevingar på jobb.
– Vi har eit mål om at vår verksemd skal gjennomførast utan at menneske, materiell og miljø vert påført skade, og vi ser alvorleg på denne type hendingar, seier Solveig Skogseth-Braathen på ferjeavdelinga i Statens vegvesen.
Annonse
Dei har no laga ein film som vert vist i sosiale media og på TV-skjermar på ferjesamband over heile landet i sommar.
– Vi har dialog med ferjeoperatørane om konkrete tiltak, og har i tillegg laga ein kampanjefilm med mål om å førebyggja dei nemnde handlingane. Vår intensjon med kampanjen er å fremja bevisstheita rundt eiga trafikantåtferd når ein reiser med ferje. Vi ynskjer å tydeleggjera arbeidet som ferjemannskapet utfører, og kven dei utfører dette for, fortel Skogseth-Braathen.
– Ferjemannskapa syt for at du kjem trygt fram. La dei vera trygge på jobb, avsluttar ho.
