Totland med oppfylgjar: – Det er ei skikkeleg røvarhistorie

Den nye boka har fått tittelen «Til døden skil oss», og Totland kallar ho ein nokså frittståande oppfylgjar.

– For dei som kjenner til «Til jord skal du bli», så er dette ei fortsetjing om den pensjonerte presten Jacob Juul som i den fyrste boka brenn sprit, blir enkemann og på slump tek livet av nokon. Bok nummer to tek opp att tråden eit halvt år seinare, fortel Totland.

– Det skal vera eit bryllaup, den varmaste sommaren i manns minne, helsa til Jacob har byrja å skranta og ting står på spel med barnebarnet og barnevernet. I tillegg dukkar det plutseleg opp eit lik på prestegarden. Det er rett og slett ei skikkeleg røvarhistorie, legg han til.

Sjølvskapt problem

Totland er klar på at desse bøkene er det kjekkaste han driv med, og er glad for å kunne gje folk eit svar på kva som skjer vidare med den pensjonerte presten.

– Desse bøkene er eit overskotsprosjekt, det gir veldig mykje å treffa folk som har hatt stor glede av boka. Det er mange som lurer på korleis det går vidare, men å svara på det har jo ikkje vore mogeleg med dei bøkene eg har skrive før, seier han.

No er førehandssalet i gang for den nye boka og Totland innrømmer at han har sett seg sjølv i ein rar situasjon.

– Eg er ein aktiv tilhengjar og forkjempar for lokale bokforhandlarar, samtidig som eg heilt kynisk sett har godt av eit stort førehandssal på nett. Det er salet på nett som gjer at eg kan hamna på bestseljarlista, men salet på nett er jo ikkje til folk i Kvinnherad, men til resten av landet, understrekar Totland.

- Eg vil jo eigentleg at folk i mi eiga bygd skal vente med å kjøpa og heller gå til Heidi på Husnes eller Bente i Rosendal og kjøpa ho der. Samtidig er det jo veldig bra for meg at utgjevinga går på nett. Det er eit problem eg har skapt, så då har eg prøvd å tenkja korleis eg kan balansera det, fortset han.

Sjeldan vare

Forfattaren kom til slutt med ein snedig plan som kanskje ikkje automatisk passar inn i 2024.

- Eg fann ut at eg snik det litt til med forlaget og bokhandlarane, slik at folk kan koma innom butikken i Rosendal eller på Husnes og skriva seg på ei lista. Det vil sei ei faktisk fysisk liste. Så kjem eg inn der før boka kjem og signerer alle bøkene som kvinnheringane har bestilt, forklarer forfattaren.

- Sjølv om ting no går veldig bra i heile landet og andre land, så er det ingen andre stader eg har meir trufaste lesarar enn i Kvinnherad. Ikkje ei gong på Bømlo, min opphavelege heimstad, kan måla seg. Det er eg utruleg takksam for, understrekar han.

Totland er glad for å ha funne ei løysing som på ein liten måte kan hjelpa dei lokale bokhandlarane her i kommunen. For han påpeikar at lokale bokhandlarar blir ei stadig sjeldnare vare.

- Det er nok ei side ved saka som folk ikkje tenkjer over, men når eg reiser rundt til landets krikar og krokar så spør eg alltid om det er ein lokal bokhandel me kan invitera til. Oftare er då svaret at ein må til nabokommunen. Folk bruker rett og slett sin lokale bokhandlar for lite. Det synest eg er trist, fortel forfattaren.

Travelt

Den nye boka kan ein finna i butikkhyllene frå byrjinga av august. Salet blir også startskotet for Totland sin travlaste haust nokon sinne, i fylgje han sjølv i alle fall.

- Eg skal blant anna på skuleturné på dagtid, men eg trappa litt ned og skal vere heime halvparten av tida. Men sidan eg også skal på skuleturné i Sunnhordland, inkludert Kvinnherad, så selde eg vekene eg skal vera heime. For då har eg turnéen på dagtid, og kjem heim til middag, forklarer forfattaren.

- Samtidig skal eg også toppa det heile med 35 kveldsshow for vaksne frå boka «Til døden skil oss». Berre eg ser på den turnéplakaten blir eg heilt tullete, berre kveldsshowa i seg sjølv er jo ein fulltidsjobb. I tillegg til dette har eg også planlagt eit stunt der eg skal innom 200 bokhandlarar i løpet av to veker, legg han leande til.

Trass den travle timeplanen, så betyr det ikkje at forfattaren er misnøgd.

- Eg har planlagt alt heilt sjølv, og sjølv om det no er så mykje at det er ein i forlaget som berre sit og planlegg logistikken, så synest eg det er gøy også. Det er noko som ligg til grunn for alt eg gjer og finn på sjølv. Det ville vore dumt å finna på ting som tek masse tid og krefter viss eg ikkje synest det var gøy, forsikrar han avslutningsvis.