Totland-effekten gav medlemsrekord
Kvinnherad mållag kan i desse dagar skilta med det høgaste medlemstalet nokon gong. Kristian Bringedal meiner «Totland-effekten» har vore avgjerande for auken, og med medvind i segla ønskjer dei å lokka enno fleire til å bli med på språkleiken.
Publisert
Sist oppdatert
I starten på september kunne Kvinnherad mållag jubla over 179 betalande medlemer, mot 127 ved utgangen av 2020. Berre Oslo, Bergen og Stord har høgare tal med omsyn til auke, men like fullt er den lokale oppgangen høgt verdsett av lokallaget.
Anders Totland, som vert trekt fram som ein av dei markante syndebukkane for auken, vert overraska over å høyre kor mange nye medlemar Kvinnherad mållag har fått det siste året, men tykkjer likevel det er svært gøy å høyra at det er rekord.
Annonse
– Når ein drar i gong eit stunt for ei god sak, er det jo gledeleg at responsen er så god. Men akkurat den dagen reid eg jo eigentleg berre på ei bølgje av motstand, seier han og viser til korleis han, som forfattar, svarte på FpU sin kampanje «F**k Nynorsk».
Stuntet vert, av stuntmannen sjølv, omtala som «å plukka lågt hengande frukter.» Leikande lett, med andre ord. Som motsats peikar han på dei som står på stand og vervar ein til to medlemer i året. Det er dei som gjer den verkelege dugnaden, slår Totland fast.
Ynskjer at ballen rullar vidare
Tala på nye medlemer er presentert av ei like oppglødd Noregs mållag. I ein e-post til lokallaga skriv moderlaget mellom anna følgjande:
Annonse
«Det samla medlemstalet til Noregs Mållag er 14739, eit særs godt tal! Etter 1. januar har me registrert til saman 1351 nye medlemer. 1300 av dei nye er komne til no nyleg.»
Dernest ramsar dei opp kva lokallag som har auka mest, og her er Kvinnherad på ein solid fjerdeplass, med fire medlemer mindre enn Stord.
Det ligg truleg an til ein jovial medlemsauke-konkurranse mellom nabokommunane ut året. For medan ballen rullar spør nemleg Bringedal & Co: «Korleis kan vi følgje opp Totland-effekten?» Svaret kjem dei med sjølv.
– Vi har tenkt å skipa til ein bokmarknad i Festsalen på Husnes i slutten av november, fortel ein engasjert Bringedal.
Bokmarknaden vil dei arrangere i samarbeid med den nye bokhandlaren på Husnes. Der vil mållaget invitere medlemene sine, og særleg dei nye. Totland vil også bli invitert, men kva effekt det vil ha om han har sjans til å møta opp, står att å sjå.
