Tore Kjell Olsen til minne

Tore Kjell var fødd på Opsanger 20. juli 1941 og voks opp på Sunde i lag med foreldra sine, Eivind og Ruth Olsen, samt søstera Liv Rose. Etter grunnskulen gjekk turen vidare til realskule på Valen. Gymnaset blei fullført på Stord og førstegongstenesta på Madla og deretter Haakonsvern, som militærpoliti. Kort tid etter at han dimitterte fekk han jobb som lastebilsjåfør hjå Gunnar Røsseland AS, der han var med på oppbygginga av aluminiumsverket og Husnes.

Tore Kjell var i unge år aktiv i Trio, der dreiv han både med friidrett, skeiser og fotball. Han hadde lenge lagsrekorden i stille lengde med 3,08 meter, noko han var svært stolt over. Han var òg leiar i friidrettsgruppa i to periodar. Som pensjonist møtte han andre veteranar i Triohuset så ofte han kunne.

Han studerte historie, engelsk og tysk på Universitetet i Bergen. Interessa for språk og historie hadde han med seg heile livet. Tidleg på 1970-talet starta han som lærar på Husnes ungdomsskule, der han var svært godt likt. På skulen trefte han òg Karen Liv Dalland, som han gifte seg med i 1973.

Etter seks år på ungdomsskulen gjekk turen vidare til trafikklærarutdanning i Stjørdal. I 1979 starta han som trafikklærar på Stord, og i 1981 var han med og starta Sunnhordland Trafikkopplæring. Her blei han i mange år, før han i 1994 starta si eiga verksemd; Kvinnherad Trafikkopplæring, som han dreiv fram til 2007. Først som 72-åring pensjonerte han seg. Det var nok som trafikklærar dei fleste kjende Tore Kjell. Han har hjelpt fleire tusen kvinnheringar fram til førarkortet.

Familien busette seg i Bogsnes i 1982, og der har Tore Kjell budd sidan. Seinare kjøpte familien hytte på Haukeli, og denne hadde dei stor glede av gjennom livet.

Det blei sagt om Tore Kjell at han var eit vandrande historieleksikon med uvanleg god hukommelse. Han hugsa hendingar heilt tilbake til barnealder. Han var ein svært sosial og godt likt mann, som det alltid var kjekt å vera i lag med. Når han snakka lytta folk, enten om det var ein god historie eller diskusjon om små og store ting. Men han sette òg pris på åleinetid. Då leste han gjerne bøker, såg dokumentarar på TV eller høyrde på opera- og marsjmusikk. Han var glad i å stella i hagen og å hogga ved, begge delar dreiv han med like til i fjor i sommar.

Vi sluttar oss til mange av orda på gravferdsbyrået si minneside om Tore Kjell: Ungdommeleg. Raus. Kunnskapsrik. Godt humør. God latter. Takk for gode minne!

Familie og vener