Tor Jørgen Sætrevik ny HKF-leiar

Årsmøtet til Husnes Kjemiske Fagforening (HKF) valte torsdag Tor Jørgen Sætrevik til å overta vervet til Ørjan Normann.

– Det er eit ærefullt verv å bli tildelt. Eg har vore nestleiar ei stund, og kjenner godt til oppgåvene som ventar, men har ved dette valet også blitt valt inn som leiar i samarbeidskomiteen for aluminium og forbundsstyret for Industri Energi, som blir nye verv for meg. Det er ein styrke for Hydro Husnes å ha den kanalen og influera gjennom, seier Tor Jørgen Sætrevik til Grenda

Sætrevik rosar organisasjonen HKF som godt bygd opp, og fleksible og løysingsorientert.

– Me er klare for dei fleste utfordringar, og utfordringar må me vera budde på. Det er ingen radikale endringar som er planlagde. Framover mot sommaren er det er lokal sanksjonsrett som er på agendaen, som er det Ørjan skal jobba med i forbundet. Han er takka av, men rett rundt hjørna, smiler Sætrevik.

– Vemodig

Årsmøte torsdag kveld gjorde også Ørjan Normann til æresmedlem etter 18 år som leiar, der Normann er den lengst sitjande leiaren organisasjonen har hatt.

– Det er litt vemodig, men det er eit val eg har tatt og er glad for å få starta i ny jobb i forbundet. Hydro Husnes og Husnes Kjemiske Fagforening vil ha stor betydning for meg vidare, seier Ørjan Normann.

Han startar 1. februar som fagleiar for landindustriavtalane i Industri Energi .

– Mesteparten av tida i starten skal eg ha fokus på lokale forhandlingsavtalar. Eg håper å vera eit verktøy for dei som skal gjera forhandlingane ute. Det har vore ei stor æra å vera tillitsvalt i så mange år. Eg er sikker på at fagforeininga, bedrifta og bransjen har ei lys og god framtid, og eg er 100 prosent sikker på at fagforeininga vil veksa på dette. Fagrørsla er ikkje berre meg eller leiaren, det er ein veldriven organisasjon som ikkje er avhengig av enkeltpersonar for å driva godt. Og slik må det jo vera. Me må laga noko som verkar om det manglar ein person. Dette vil gå fint, og det er slik det skal fungera, kommenterer Normann.