Toppe tipsa om midlar til kyrkjene
Då statsråd Kjersti Toppe møtte Levekårsutvalet, vart også vedlikehald av gamle kyrkjer tema.
Etter å ha vitja BUA i Rosendal, gjekk barne- og familieminister Kjersti Toppe (Sp) opp til rådhuset for å helsa på Levekårsutvalet. Der venta ho høfleg på gangen i ti minuttar, til dess dei var ferdige med saklista. Då ho sette seg ved bordet, vart mellom anna kyrkjene i Kvinnherad tema. Kyrkjesaker ligg nemleg til hennar departement.
– Eg veit de har mange kyrkjer, og to mellomalderkyrkjer kostar mykje, sa Toppe.
Annonse
– Har du vore i Kvinnherad kyrkje? Den er vi så stolte over, smilte utvalsleiar Inger-Elin Nesheim (KrF).
Toppe stadfesta at ho hadde vore inne i den vel 750 år gamle kyrkja i Rosendal for to år sidan.
– Det er ei så vakker kyrkje. Det er mange vakre kyrkjer her i landet, men den … Den er heilt fantastisk, Kvinnherad kyrkje er verkeleg ein skatt, kommenterte Kjersti Toppe.
Orgel
Annonse
Kvinnherad har fått midlar til bevaring av mellomalderkyrkjene på Ænes og i Rosendal. Ifølgje Toppe set regjeringa av opp mot 500 millionar kroner i året til sikring av slike gamle steinkyrkjer. Dette er ein ordning ein ser for seg skal eksistera i mange år framover. Og så kom ho med eit godt tips.
– Det er ikkje berre ytre ting ein kan søkja om. Det er også viktige kulturminne inne i kyrkjene, sa ho, og ramsa opp interiør, altertavler, ljosekroner, til og med orgel.
– Vi satsar på at vi har denne kyrkja i 800 år til, avslutta Inger-Elin Nesheim.
