Toppe nr. 1 – Nordhus 17

Nominasjonsnemnda i Hordaland Senterparti er ferdig med arbeidet, og la tysdag fram sitt forslag til valliste. Samrøystes har dei valt å innstilla Kjersti Toppe som fyrstekandidat. Endeleg liste er det nominasjonsmøtet i Hordaland Senterparti som vedtek den 16. november.

«Kjersti Toppe er kjent som ein engasjert og prinsippfast politikar. Ho har gjennom mange år vore ein flott representant for Hordaland, og har brei politisk erfaring» seier leiar i nominasjonsnemnda, Mette Heidi Bergsvåg Ekrheim, i ei pressemelding.

Toppe har vore valt inn på Stortinget for Hordaland Senterparti sidan 2009. Ho er i dag barne- og familieminister i Jonas Gahr Støre si regjering, og har vore det sidan oktober 2021. Kjersti Toppe er 56 år og kjem frå Åsane i Bergen. Ho er utdanna lege, og har jobba som kommunelege i Bremanger og i Bergen. Ho har elles sete i Bergen bystyre frå 2003 til 2009, og i fylkestinget i Hordaland i perioden 2007-2009.

Dissens

Kanskje noko overraskande står ikkje vossingen Nils T. Bjørke på 2. plass, men derimot på 7. I staden har 2. plassen gått til Lars Fjeldstad frå Osterøy. Men her var det dissens, for to av medlemmene i nominasjonsnemnda ville heller ha Bjørke øvst av desse to.

«Eit fleirtal i nemnda har hatt fokus på rekruttering, medan andre i nemnda har sett erfaring og eksisterande verv som eit mål for val av kandidatar», vert det forklart i pressemeldinga.

Marianne Nordhus frå Fjelberg står på 17. plass på lista.