Topp stemning på lokalrevy

Revyen i Høylandsbygd slo verkeleg an hos publikum. Med rundt hundre frammøtte var båthuset fylt til randen då Høyåker musikkkorps og fire revy-veteranar skipa til revyen (anti) Back Again fredag og laurdag.

Den eine gode sketsjen blei servert etter den andre. Bygdekjenningar vart tekne på kornet og tulla med, og dei frammøtte lo frå dei kom til dei gjekk. Revygjengen fekk særs god respons, og det tala for at publikum fekk valuta for pengane.

– Då me hadde generalprøve hadde me lagt opp til 1,5 times program. Men mykje latter og improvisasjon frå skodespelarane gjorde at dette sprakk. Resultatet vart to timar med tettpakka underhaldning, og som ein av publikum sa; det var ikkje eit minutt for langt, seier Arve Bjørnevik i Høyåker musikkkorps.

Allsong

Etter revyen var det allsong til flott gitarspel og song av Astrid Eikemo og Therese Størksen.

– Det var kjempe stemning fredagen, men laurdagen tok det av med eit godt blandakor frå øya, som nesten fekk taket til å letta. Fleire av publikum sa dei var glad Covid-19 var over, og at dei hadde lengta lenge etter noko slikt, fortel Bjørnevik.

Båthuset var fult begge kveldane med ca 100 personar i lokalet. Før, under og etter revyen var det råd å kjøpa seg speketallerken og lesk.

– Kanskje, kanskje ikkje

Høyåker musikkorps vil retta ei stor takk til alle som fann vegen til bygda både fredagen og laurdagen, samt til alle som bidrog til at kvelden vart ein suksess.

– Takk til Wenche Synnøve Ersland, Anja Regin, Therese og Thomas Størksen for gode roller på scena. Frå musikkorpset bydde òg Astrid Eikemo, Ove Stokka, Sissel Åsheim og Arne Bjørnevik på seg sjølv. Til slutt må me få retta ei stor takk til lys og lyd-mannen vår Kjartan Hansen, som med stødig hand gjorde at alle fekk med seg poenga på scena.

– Kven veit, kanskje kjem revy-gjengen sterkt tilbake. Kanskje, kanskje ikkje, veit ikkje, seier Høyåker musikkkorps.