Tolv gode grunnar til å ta turen på Festidalen i helga

Fredag

Eit musikalsk eventyr skal nok ein gong skrivast, og allereie i første avsnitt får festivalpublikummet bli betre kjend med Sondre Lerche.

Bergensartisten har fått svært gode kritikkar på sitt siste album Avatars of Love, kor mellom anna låta «Dead of the night» står fram som ein ti minuttar lang og herleg meditasjon over kva musikk kan vera. Lerche og bandet hans spelte nyleg på Bergenfest, til eit fullsett Bastionen. Dette var truleg ei god oppvarming før han skal opne Festidalen for eit fullsett Dønhaug på fredag.

Postpunk-kvintetten Jejune har fått ansvaret for å bringa festivalkvelden vidare. Sidan oppstarten i 2017 har bandet frå Kristiansand etablert ein rå og utradisjonell tilnærming til det musikalske universet, der resultatet er ei deilig blanding av postpunkens attitude og 60-talet sine søte melodiar. Ein hybrid som umogleg kan slå feil.

Dernest vil Izabell + Kriminell Kunst fylle både scena og jordet med fest. Den trufaste Festidalgjengar har allereie kjennskap til Kriminell Kunst, som sist vitja jordet på Dønhaug i 2019. At dei no kjem attende meiner arrangøren er ei sann glede, likeeins at dei denne gongen har med seg den ypparste kvinnelege rapparen i heile landet. «Ein veit ikkje kva fest er før ein har opplevd denne gjengen», meiner Festidalen.

Stemninga skal såleis vera god når det er dags for Das Body. Festidalen meiner det blir dampande heitt når Ellie Linden, Kim Granholt, Patrik Alm og Didrik Karsrud går på scena. Allereie i sitt første år som band, i 2017, vart dei booka til Øyafestivalen og ByLarm, og dei har haldt fram å hausta anerkjenning for musikken, som blir omtala som mørk, sensuell, forskrudd og forførerisk. Om du søkjer ekstase er dette ein konsert du vil få med deg.

Fredagskvelden blir endeleg komplett med Madrugada, som i 2019 fann saman att og som denne vinteren har skjenka fansen med den nye plata «Chimes at Midnight». Grenda stiller seg bak Festidalen som seier følgjande om fredagens headliner: «Det er meiningslaust å skildra og skryta av Madrugada. Folk veit kva dei er og kva dei leverer. Dette er magisk snadder i lydformat.»

Laurdag

Torgeir Waldemar skal byrja laurdagen med å smelte hjarter med sine sterke tekstar, inntulla i eit musikalsk landskap innan rock, vise, folk og country. «I ei tid der murar vert reist og hat vert spreidd, meiner han sjølvsagt at kjærleik er svaret», skriv Festidalen om ein av landets mest kritikarroste artistar. Han gav ut sitt første album i 2014, eit album vart nominert til Spellemannsprisen i kategoriane årets nykommar og country. Sisteplata Love blir omtala som vintage-Waldemar og med emneknaggane til Festidalen høver det særs godt å starte laurdagen med litt kjærleik.

Hedda Mae, som har sterke røter til Kvinnherad, bringer dernest litt pop inn på jordet. Ho er i følgje arrangørane full av overskot, akrobatisk og oppløftande, fryktlaus og fargerik. Likeeins som Das Body blir også Hedda Mae omtala som unorsk, ein merkelapp som her kan oversetjast som frisk og uredd. Musikken har anar frå 80-tals pop, retrodisco, og gospelfarga R&B, og det er mogleg difor ho vart kåra til den friskaste nykommaren av Dagens Næringsliv i 2020.

car.pool vann Vestlandssatsinga i 2020, og er no klare for å spela fletta av alle som kjem til jordet på Dønhaug. Dei omtalar seg sjølv som ein eksplosjon av 80-tals pop og moderne rock, og lovar eit lydbilete og sceneshow av typen «det beste sparket i magen du har fått på lang tid!». Festidalen lovar på si side at ikkje eitt sekund blir keisamt når denne friske gjengen frå Rogaland går på scena.

Så var det Skambankt. Dei vitjar no Uskedalen og Kvinnherad for siste gong på sin avskjedsturne for å servera ein episk fest på Dønhaugbakkane. Tidlegare i vinter kom den siste plata deira «Ti» ut til strålande kritikkar, før bandet i mai fortalte fansen at det no var slutt på moroa. For å ta del i det vakraste og mest gnistrande adjøet, bør du befinna deg på eit visst jorde i Uskedalen laurdag kveld.

Og det er sjølvsagt fleire grunnar til å plassera seg sjølv i spesifikke geografiske navlen enn dei som til no er nemnde.

Då den strame rocken til Skambankt har løya vender lydbiletet seg mot ein annan type hit-maskin. Sogningen Kjartan Lauritsen har blitt trykt til mange rap-glade hjarter for låtar som Fredag, Porno, Tada og Havanna, og før laurdagskvelden er omme vil han truleg bli trykt til enno fleire hjarter. Han stiller nemleg med fleire nominasjonar av typen «Årets live artist». Kjartan Lauritzen er ein oase, ein drueklase, og truleg landets mest positive stemningsskapar, fristar Festidalen.

Ringen blir slutta då bergensartisten Gabrielle endeleg kjem til Uskedalen som årets endelege punktum for Festidalen 2022. Med seg i bagasjen har ho ferske låtar som «Neil Young» og «eg ser deg», og dei fleste kjenner truleg betre til katalogen hennar enn dei er klar over (eller vil medgi). Etter at «Ring meg» byrja å surra på alle landets høgtalarar i 2011 har iallfall Gabrielle levert eit lass med fengande godsaker, på dialekt. Ho vil servera tidenes laurdagsshow, lovar Festidalen.