Tok tid å fiksa gateljosa

Gjennom nokre veker har Grenda blitt tipsa om mørklagte gater fleire stader, då vegljosa der ikkje har fungert. Konkret dreiar deg seg om Valen frå Solfeng til kyrkja, Uskedalen frå brua til Børneset, og gjennom Dimmelsvik.

– Det har blitt innrapportert, men det skjer ikkje noko, sukka ein lesar.

Grenda tok fatt i saka førre onsdag. Fyrst kravst det nokre telefonar for å få greie på kven rette vedkomande i Vestland fylkeskommune er. Han tok ikkje telefonen, men bad oss senda melding. Det gjorde vi, men den har ikkje blitt svara på. Etter fleire purringar, fekk vi svar like før avisa gjekk i trykken i går. Dette kjem som eiga sak i neste avis.

På tide

På laurdag tok lokalpolitikar Gunnar Helleland (INP) sjølv og sendte e-post til fylkeskommunen, med kopi til Kvinnherad kommune.

«Sist vinter var store deler av Dimmelsvik utan vegljos. Vi fekk då beskjed om at armaturane skulle skiftast. Dette er gjort, og bra er det. Problemet er berre at heile ljosrekka frå brua over Storelva og til BKK på Vikjo er mørke, det vil seia lyser ikkje. Vegstrekninga har mykje trafikk både av mjuke trafikantar og mykje bilar som køyrer godt over fartsgrensa», skreiv han, før han kom med ei klar oppmoding:

«Fylket: No er det på tide at desse vegljosa vert i orden! Må det ei ulukke til før det skjer noko, vonar vi slepp det. Ja, det er rapportert inn på skjema, men ingen ting skjer».

Plutseleg i orden

Gunnar Helleland avslutta med eit hjartesukk kring salet av Kvinnherad Energi.

«Sånn går det når vi gjev frå oss lokalberedskapen. Hadde dette vore i Kvinnherad Energi sine dagar, så kunne ein tatt ein telefon og fått det fiksa. No veit vi ikkje ein gong kven vi skal henvenda oss til, utanom eit skjema (som ser ut til å ikkje verka) på fylket sine sider».

Om Grenda sine telefonar eller Gunnar Helleland sin e-post har spelt noko rolle, veit vi ikkje, men dei siste par dagane har i alle fall ljoset kome tilbake igjen.