Tok seg til finalen i NM i gjetarhund-føring: - Veldig overraska!

– Eg har ikkje sove så mykje i natt – det har kverna mykje i hovudet om korleis me skal løysa oppgåvene i dag, fortel ho.

Ingebjørg Kjærevik (41) bur på Seimsfoss, og er tilsett som gardsansvarleg i Baroniet. Her har ho ansvaret for 130 sauer, og brukar gjetarhund i arbeidet med dei.

– Eg brukar hunden mest i jobb, det er no det som er viktig. Konkurransen er jo berre noko galskap ein driv med utanom, ler ho.

Mykje ein ikkje kan kontrollera

I NM har ho med seg border collien Zia på 7 år, som ho har avla og trent sjølv. Bruk av gjetarhund er ein liten sport i Noreg, men nivået er svært høgt, kan Kjærevik fortelja. Ho vart lista som nr 6 over utøvarar frå Hordaland, og stilte i NM utan store forventningar om å koma seg vidare.

– Her er det både noregsmeistrar og verdsmeistrar, så eg kjenner meg litt uerfaren og nervøs.

Det er svært intrikate oppgåver hundane og førarane får. Det er mykje føraren ikkje kan kontrollera, i ei ein sport som inneheld dyr og ulike vêrforhold. Oppgåvene skal utførast på tid, og det er fort gjort å bli diskvalifisert dersom hunden byrjar å jaga eller glefsa på sauene.

– Både førar og hund skal ha ein god dag, du skal helst ikkje ha skodde, og så er det sauene då – ein veit jo ikkje korleis dei ter seg, forklarar Kjærevik.

Sauene skal takast godt vare på av førar og hund gjennom prøven. Men det kan vera vanskeleg å brått måtte forhalda seg til eit heilt anna landskap enn heime på Vestlandet. Der Ingebjørg og Zia er vant til eit kupert og bratt landskap, er det utfordrande å konkurrera i eit område på 450 meter med «paddeflatt» terreng.

– Det kan vera vanskeleg å sjå sauene, og halda kontakt med hunden. Og om det kjem skodde då, vert det endå vanskelegare, seier Kjærevik.

Stressa av finaleplassen, men nøgd til slutt

Laurdag gjennomførte Zia ein kjempegod konkurranse. Av 90 deltakarar var Ingebjørg Kjærevik ein av berre 16 som kom seg vidare til finalen søndag.

NM-finalen byr på oppgåver som Ingebjørg og Zia aldri har gjort før. Zia skal først henta éin flokk, før Ingebjørg skal få ho til å snu, og henta endå ein flokk. Tjue sauer skal samlast og førast, før hunden skal klara å sortera ut fem merka sauer og få dei inn i ei innhegning. Alt dette skal gjerast på 25 minutt.

– Eg vart eigentleg litt stressa då eg kom vidare til finale, for me har jo ikkje førebudd oss på desse oppgåvene! Målet får vera å koma oss gjennom det og berre takla situasjonen, meiner Kjærevik.

Etter finalen får me ei oppdatering frå Kjærevik. Ho fekk utfordringar i finalen, men klarte likevel å avslutta på ein flott 9. plass.

– Eg er nøgd med plasseringa, i utfordrande forhold, konkluderar ho.