Tok praksisen hjå tante, Milo og Grenda
Denne veka har Grenda hatt ein heilt spesiell gjest med i redaksjonen. Ungdomsskuleeleven Gjøa Emilie Rosvold frå Søfteland i Os ynskte å ha arbeidspraksisveka si her.
Då mor til Gjøa føreslo å ta praksisveka hjå tante, Milo og Grenda tykte Gjøa at det høyrtest kjekt ut. Tanta til Gjøa er nemleg Grenda sin eigen Gunn-Bente Stølen, og Milo er Gunn-Bente sin halvt år gamle pelsbaby i form av ein såkalla Maltipoo.
– Så langt har det vore veldig gøy, og eg har fått prøvd meg på mykje nytt, både å skriva saker og ta bilete av ulike ting. I tillegg har det vore deilig å koma seg litt vekk frå skulen, fortel Gjøa.
Annonse
– Kva var det som gjorde at du gjekk med på å ta praksisveka di her hjå oss?
– Det høyrtest spanande ut, samtidig tenkte eg at det ville vore kjekt å bu i lag med tante og Milo ei veka, smiler ho.
Femti-femti
Til vanleg går Gjøa i niande klasse ved Os ungdomsskule, og heime er på Søfteland saman med pappa Espen, mamma Gøril og veslebrørne Liam og Birk. På fritida si er det eit par ting som heng høgast.
Annonse
– Eg liker godt å gama (spela dataspel, journ.merk.). Då går det mest i skytespel, men eg er også veldig glad i å lesa, i tillegg til å vera med vener, seier ho.
– Kva bøker går det mest i?
– Eg les mykje fantasy-bøker. Akkurat no les eg om att ei bok frå ein bokserie som heiter Kattekrigerne. Det var denne serien som gjorde at eg byrja å elska å lesa då eg var yngre, fortel ho engasjert.
I fylgje niandeklassingen freistar journalistyrket meir etter å ha fått prøvd det ut ei lita veke, sjølv om nokre ting har vore utfordrande.
– Det har vore veldig gøy å fotografera, og å få vera med på å dekka volleyballkampen. Men det å skriva var litt vanskeleg, sjølv om eg er veldig glad i skriva så må eg tenkja og fokusera ganske mykje. Det er litt tungt, innrømmer ho.
– Det freistar framleis å bli journalist, men kanskje endå meir etter at eg har fått lappen, legg ho til.
Annonse
– Dersom det ikkje skulle bli journalistikk, kva anna kunne du tenkja deg å bli?
– Eg har tenkt på noko innan helse, kanskje ambulansearbeidar. Det verkar spanande. Eg har lyst til å gjera noko viktig, som å hjelpa folk og redda liv. Samtidig kunne eg tenkt meg å bli rik også, så det ligg litt sånn femti-femti mellom rik og viktig. Helst begge deler, avsluttar Gjøa lattermild.
