Tok på spanderbuksa for Kvinnherad

Sparebanken Vest er 200 år i år, noko som banken har markert på ulikt vis, mellom anna ved å dela ut gåver til lag og organisasjonar i to ulike vender i år. Banksjef for Kvinnherad og Bømlo, Vivi Loftheim var innom dette i si innleiing før gåvesjekkane vart fordelte.

– Det ligg i sparebankmodellen å gje pengane ein tener tilbake til samfunnet. I dag kan Sparebanken Vest dela ut inntil 50 prosent av overskotet til slike gåver, forklarte Loftheim.

Lyttar på havet

Gåvene var i storleik mellom 20.000 og 825.000 kroner, og såg ut til vera kjærkomne for kvar einaste mottakar. Den største summen gjekk til Rosendalsstiftinga, som skal bruka midlane til eit prosjekt som verkeleg gjekk heim hos gåveutdelarane.

– Dette prosjektet skal produsera ein multimedia film og tilhøyrande formidlingsplan om den viktige koplinga mellom marine ressursar og verdiskaping på Vestlandet gjennom 1000 år, forklarte Loftheim i samband med tildelinga.

Prosjektet har som ambisjon «å bidra til nysgjerrigheit, interesse, eigarskap, diskusjon og forståing for den framtidige, berekraftige bruken av kyst og hav».

– Prosjektet har som føremål å formidla til barn og ungdom om den spennande koplinga mellom hav- og kystressursar og maritime næringar. Dette ser me på som eit svært viktig prosjekt og difor har Rosendalstiftinga fått 825 000,- til «Vi lyttar til havet» prosjektet sitt, grunngav banksjefen.

Øystein Skaala takk audmjukt for gåva.

– Me skal bruka gåva maksimalt, og me kjem til å fokusera på vestlendingane. Vestlendingane er tett kopla på havet, inkludert ein lang industrihistorie knytt til havet. Me kjem til å starta filmen vår med Halsnøybåten, som er 1500 år gamal. I dag snakkar me heile tida om behovet for omstilling, men me vestlendingar har omstilt oss i minst 1000 år, forklarte initiativtakaren, som meinte me må finna ut korleis me skal nytta havet framover.

– Det er nokon ressursar der som er så svimlande, og som nesten ingen nordmenn veit om. Eg veit om dei, for eg har hatt heile karrieren min på Havforskingsinstituttet, og har hatt høve til å kikka inn i det. Så tusen hjarteleg takk for gåva, me skal nytta ho godt, lova Skaala.

Kursa trenarar

I serien kjærkomne gåver var også dei 154.000 kronene volleyballgruppa til Trio fekk.

– Me har flytta inn i ny hall, og då er det mykje nytt utstyr som må på plass, forklarte Javier Araya.

Volleyballen har flytta inn i Kvinnherad Arena, og har ikkje lenger alt det dei hadde i Husneshallen.

– Me skal også bruka ein del av denne gåva på å kursa trenarar, som desse to, smilte Araya, som hadde med Oline Skogseth og Thea Elise Eliassen på utdelinga.

– Me trenar åtte 3. og 4. klassingar, som nyss har byrja å spela volleyball. Det er veldig kjekt, sa jentene til Grenda.

Gåvene:

Rosendalstiftinga: 825 000,-

Festidalen: 260 000,-

Sunde Kyst- og Litteratursenter: 210 000,-

Rosendal Turnlag: 200 000,-

Omvikdalen Ungdomslag: 200 000,-

Uskedal Idrettslag: 200 000,-

Fjelberg Bygdalag: 200 000,-

Halsnøy Kulturhus Velforeining: 180 000,-

IL Trio, Volleyball: 154 000,-

Stiftinga Halsnøy historiske senter: 150 000,-

Valedamene: 150 000,-

IL Trio, fotball: 100 000,-

Fjellhaugen Skisenter: 100 000,-

Halsnøy Idrettslag: 100 000,-

Ølve Bygdalag: 80 000,-

Ølve og Hatlestrand Bygdalag: 50 000,-

Landa bygdalag: 50 000,-

Venelaget for Halsnøy Kloster: 50 000,-

Fest i Valen: 50 000,-

Vidsyn Musikkfestival: 50 000,-

Høylandsbygd Bygdalag: 50 000,-

Turstiar Toftåsen Storemyr: 45 000,-

Perlene: 40 000,-

Kvinnherad Turlag: 30 000,-

Åkra Bygdalag: 20 000,-

Skeishagen Velforening: 20 000,-

Folgefonn Sportsskytterlag: 20 000,-

Turstiar Sunde: 20 000,-