Tok opp temaet lukt på folkemøte

Både næringssjef Grete Solheim, dagleg leiar for Hardanger Biogass Reinhardt Lund-Mikkelson, driftssjef for Hardanger Biogass Trond Lekva Myklebust, samt også dagleg leiar for selskapet Recul, som tek seg av all behandling av utslepp av lukt, Siv Malmanger var til stades for å svara dei frammøtte etter beste evne.

Rette tomta

Etter nokre rundar med powerpoint-framsyningar og føredrag med informasjon om både prosjekt, prosess og teknologi, kom tida omsider til spørsmålsdelen av det spenningsfylte møtet, og fleire av dei frammøtte hadde mykje på hjarta.

– Det er nytt for oss dette med biogass, og eg veit at det er langt fleire slike anlegg i Danmark, men kva er luktbilete der og har det vore noko problem? spurte ein av dei frammøtte.

– I Danmark har dei dei same krava som Norge har, men det varierer også frå anlegg til anlegg kor mange barrierar det treng utifrå kor anlegget ligg. Eit anlegg som ligg langt frå alle naboar treng færre barrierar enn eit som ligg tett på naboane, forklarte dagleg leiar for Recul Siv Malmanger.

– Og det er fleire anlegg som har naboane langt tettare på enn på Husnes. Me har vore og sett på mange ulike anlegg som klarer å reinsa ned til 500 lukteiningar, forsikra ho.

Dette svaret lokka fram fylgjande spørsmål; Kvifor då ikkje berre leggje anlegget til ein stad der det ikkje sjenerer nokon, lurte ei dame på.

– Me trur ikkje dette kjem til å sjenera nokon, svarte Malmanger.

– Tomta me fyrst såg på inne i Dimmelsvik var for liten, det er denne tomta som er den rette for dette prosjektet, la dagleg leiar for Hardanger Biogass Reinhard Lund-Mikkelson til.

Vesentleg skilnad

Det som mange nok var mest nyfikne på var kva som skil anlegget på Husnes frå Renevo sitt anlegg på Stord.

– Stemmer det at de bruker ein annan teknologi her enn Renevo gjorde på Stord, og kan biogass brukast i staden for naturgass i til dømes infrastruktur og i motorar sånn heilt utan vidare? lurte ein annan på.

– Det er på alle måtar rett at me brukar ein annan teknologi enn Renevo, og ja, biogass kan enkelt erstatta naturgass, var det korte og konsise svaret frå Lund-Mikkelson.

Siv Malmanger forklarte korleis dei har vore inne og jobba med lukthandteringa for anlegget.

– Me har komt tidleg inn i prosessen her, og det har me ikkje vore før. Det har vore eit stort fokus på lukt og me opplever eit godt gjennomarbeida prosjekt. Blant anna har me kjøpt inn værdata frå Husnes og me har jobba mykje med flytskjema for anlegget for å ha kontroll på lukt, svarte Malmanger.

– Anlegget er designa for å tilfredsstilla kravet for lukt hjå naboar, det er nytta eit «worst case»-scenario i vurdering av alle parametrane, i tillegg til at det er lagt opp til fleire barrierar for å sikra at luft ikkje vert sloppe ut ureinsa. I tillegg kjem me til å ha ein 20 meter høg skorstein som ei siste barriere som sikrar at lukta tynner seg endå meir ut og blir sloppe ut høgt nok oppe i lufta til at ho heller ikkje sjenera naboar, dersom det framleis skulle vera noko merkbar lukt att, la Malmanger til.

Driftssjef for Hardanger Biogass Trond Lekva Myklebust gjekk også litt innpå ein annan vesentleg skilnad på Renevo sine løysingar og Hardanger Biogass.

– Renevo har ein annan teknologi med færre barrierar, i tillegg til at dei har lossing og fylling av tankane ute. Her kjem all lossing og fylling til å skje i eigne lukka hallar der bilane køyrer heilt inn, forklarte han.

Positive

Eit av dei siste spørsmåla gjekk på om dei kunne garantere for at det ikkje kom til å koma noko sjenerande lukt frå anlegget.

– Nei, det kan me ikkje garantere, men forarbeidet kan knapt bli betre. Det er også sett opp så mange barrierar at det blir minst mogeleg, svarte Malmanger.

– Alt luktar, sjølv brødet ditt heime luktar noko, men tala me syner til her er gjennom eit såkalla «worst case»-scenario. Det vil sei at me 99 prosent av tida er innanfor krava, noko som betyr at det i verste fall blir 7 timar per år ein ikkje er innanfor, forklarte ho vidare.

Det var derimot ikkje alle som stilte seg negative til utbygginga, men tvert i mot tok ordet for å gje si støtte til det nye anlegget.

– Nei, det er klart det ikkje er nokon garanti for at det aldri kjem til å koma lukt, men eg set pris på ærlegdomen dykkar i denne prosessen. Eg støttar prosjektet, kommenterte ein av herrane lenger framme i salen.

Økonomisjef for Hydro Husnes og styremedlem i Grøn Næringspark Jonny Flatebø hadde også valt å vera til stades på møtet.

– Eg stiller meg positiv til at ting skal skje, kommenterte Flatebø.