Tok julebadet i sjøen

Ein skulle tru at for folk flest – det er jo vår tur no – er tanken på eit sjøbad i desse dagar omtrent like fjern som sju rette i lotto. Likevel finns det ein gjeng som frivillig, og tilsynelatande med stor glede, seinkar lekamen sin ned i Hardangerfjorden kvar tysdag på slaget klokka 18.

– Det er herleg! Spesielt når du kjem opp att og har fått på deg tørre klede, påstår Anne Sigrid Totland før ho skal kasta seg i det.

11 i fjorden

For fjordbadarar har vêret på land fint lite å seia for om dei skal uti eller ikkje. Men dette er jo ikkje ein tradisjon som starta opp i desember. Heldigvis, får ein seia, for elles kunne ikkje dei 11 som dyppa seg vore vel bevarte. At dei alle var iført nissehuser må seiast å vera formildande for dei som stod igjen på land.

Initiativtakar for det heile var Elna Storegjerde, som drog det i gang i haust.

– Eg har nyss flytta hit, og spurde ut om nokon kunne tenka seg å bli med. Eg har drive med året rundt-bading sidan 1992, og snakka med Ingebjørg Eik, som var villig til å ofra seg litt for at me skulle få dette i gang. Så møtte eg Anne Sigrid Totland på veg heim frå bading ein gong, og ho svara «Ja» med ein gong.

– Eg er lett å utfordra, vedgår Totland.

– Eg har drive med slikt i mange vintrar i Norheimsund. Det er mykje lettare å få til noko slikt når ein har eit fast tidspunkt. Då kjenner du eit slags ansvar for å møta opp, legg Totland til.

Storegjerde påpeikar eit anna moment med fast tidspunkt som også kan bety litt:

– Då er me fleire på plass, og kan dermed passa litt på kvarandre også. Spesielt no når det er mørkt om kveldane. Difor så tel me også opp kor mange me er som går uti, og tel etterpå for å sjekka at alle er komne opp. I dag var me 11 uti, pluss to hundar på land, seier Storegjerde til Grenda etter badet.

8 grader

Begge to er klokkeklare på at badinga er endorfinfrigjerande.

– Det er fantastisk når du kjem heim etterpå. Blodårene trekkjer seg saman når ein går uti, og når dei vidar seg ut etterpå, så får du ein veldig god varme innanfrå, seier dei med patos.

Aldersspennet på baderane denne tysdagen var frå midt på 20-talet til opp i nesten 75 år, som Storegjerde blir til jul.

– Slik bading er fantastisk. Eg kjem ikkje til å slutta med det. Når eg blir så gamal at eg ikkje klarer å gå uti sjølv, så skal eg ha ein slik gåstol som hjelper meg ut, hevdar 74-åringen.

– I den litt trasige perioden me har vore i, så er dette eit kjekt alternativ. Dessutan er me ute, og det er smittevernmessig trygt i så måte, meiner Totland.

Temperaturen denne hufsne tysdagen vart målt til omtrent åtte grader.

– Det er det lågaste me har hatt i år, seier Storegjerde.

– Me har ofte vore litt skuffa over at det ikkje har vore kaldare. For det har kjentest kaldare ut, flirer Totland.

Når Grenda ymtar frampå om det er på tide å koma seg heim før dei blir kalde, er kvinnene kontante i svaret:

– Neida, det trengs ikkje, me er varme, me!

Og skulle nokon få lyst til å kjøla seg ned før jul med denne gjengen, så blir det eit nytt bad førstkomande tysdag. Og etter alt å døma dei neste tysdagane etter det også.