Tok grep: Sikra adventskosen til Rosendalstunet

I år som i fjor gjekk ein gjeng kjekke damer frå Rosendal Helselag saman for å baka heimelaga julekaker til brukarane på Rosendalstunet. Deigane vart laga på førehand heime, og damene hadde både dobla og tripla oppskriftene. Men akkurat kor mange kjeks som blir laga, er dei litt usikre på.

– Det må i alle fall vera tusen, konkluderer leiar for helselaget Bente Haugen etter litt tenketid og felles rekning.

Gode samtalar

Det heile starta eigentleg for nokre år sidan då Haugen kom i snakk med to som jobba på Rosendalstunet, som den gong jobba friviljug overtid på kveldstid for å baka til dei eldre. Derimot uttrykte dei samstundes frustrasjon over det manglande tilbodet.

Haugen tok grep og tok saka opp med helselaget, noko dei stilte seg utelukkande positive til.

– Dessverre så dukka pandemien opp før me rakk å koma i gang, men i fjor fekk me det endeleg til og det vart ein kjempesuksess. Dette er ein tradisjon me absolutt ynskjer å fortsetja med, fastslår Haugen.

Denne dagen er dei ein gjeng på om lag 10 personar, både folk frå helselaget og andre friviljuge, som gladeleg stiller opp som bakarar.

– Dette er vår julegåve til brukarane. Dei færraste ynskjer å bli med på bakinga, dei føler gjerne at dei har gjort nok av det i si tid. Men dei vil meir enn gjerne smaka på og sitja og prata. Det blir mange gode samtalar der dei fortel om kva dei hugsar frå sin barndom, og ikkje minst ein god del latter og god stemning. Alle luktene vekkjer gjerne minna til live att for mange, seier Haugen.

Det er også viktig for dei friviljuge at det ikkje blir noko hastverk med bakinga.

– Det skal ta litt tid, det er eit veldig fint adventsopplegg, og Rosendalstunet er ein så utruleg god plass å koma til. Me blir teke godt i mot kvar gong me kjem hit, og dei set sånn pris på oss. Me kjenner oss veldig takksame for det, fortel helselagsleiaren.

Få menn

Blant alle dei drifitge damene, finn me éin mann, nemleg Jan Ove Kårstad, som sit i eine hjørna av daglegstova innhylla i steikeosen frå mjølkekakene sine.

– Eg vart pensjonist for tre år sidan, men dette er mitt fyrst år som friviljug. Mjølkekakene derimot har eg laga i mange år, forklarer Kårstad, som jobbar som friviljug eit par gonger i månaden.

– Eg trivs i lag med alle desse kjekke damene, og eg likar godt det å vera friviljug og få yta noko for andre, men det er klart at det hadde vore kjekt om fleire menn også blei med. Ikkje nødvendigvis berre med matlaging, det finst andre ting også. Til dømes Syng med oss, elles er eg med og gjer det eg blir sett til, forklarer Kårstad som fram til pensjonistalder jobba på ferja mellom Gjermundshamn - Årsnes - Varaldsøy.