To ville bli dagleg leiar i Fjellhaugen - no står ein att

Søknadsfristen var 10. oktober, og innan fristen hadde skisenteret fått inn to søknader. Den ein frå Steinar Albrethson (56) frå Omvikdalen og ein søknad frå ein person som seinare trekte søkanden sin.

– Me har ikkje hatt intervjurunde enno, men reknar med å ha gjort unna intervju før oktober er omme. Deretter vonar me på rask avgjersle, og tilsvarande rask oppstart for den nye daglege leiaren. Me har eit oppegåande og driftig styre, som skal hjelpa leiaren inn i rolla på ein rask og fin måte, kommenterte styreleiar Sissel Haugen tysdag kveld om tilsetjingsprosessen.

Onsdag morgon kom meldinga om at den eine av søknadane var trekt. Dermed står skisenteret att med éin søkjar til deltidsstillinga som dagleg leiar.

Kvinnherad kommune er majoritetseigar av Fjellhaugen Skisenter as, og søkjarlista til stillinga fell difor innunder offentleglova.

– Korleis er ein rigga for vinteren?

– Det er ingen store ting som skal gjerast eller investerast i år. Me skal sjekka medbringarane før dei blir hengt opp på vaieren, og så må me byggja opp att eit sponsorskilt som blei tatt i stormen i vinter. Elles er det slik det plar vera før snøen kjem, seier Haugen.