To til legesjekk etter kollisjon
I 13-tida 2. juledag rykte naudetatane ut til ei trafikkulukke i Kaldestadvegen. Tre personar var involverte, og to av dei vart sendt til legesjekk.
Publisert
Sist oppdatert
Politiet vart varsla om hendinga klokka 12.57 torsdag.
«Naudetatane er på veg til staden etter melding om ei trafikkulukke. Front mot front. To bilar. Tre personar involvert. Airbaggar utløyst. Alle er vakne og tilsnakkande. Ukjent skadeomfang utover det. Vegen er heilt sperra», skreiv Vest politidistrikt.
Annonse
I ei oppdatering stod det at det var større materielle skader, og at bilbergar var på veg.
Til Bergens Tidende seier politiet at ulukka har skjedd i ein sving, og at ein av bilane må ha kome over i motsett køyrefelt. Politioverbetjent Torgeir Fosse på Kvinnherad politistasjon er ikkje så kategorisk.
– Det er ein svingete og litt smal veg, og ein må tilpassa køyringa etter tilhøva. Politiet opprettar sak, men det er ikkje gjort beslag i førarkort, seier han til Grenda.
Fosse fortel at to av dei involverte vart sendt til legevakta for vidare undersøkingar, men det er ikkje meldt om alvorlege personskader. Uhellet skjedde like ved bedehuset på Kaldestad.
