To personar gjekk til angrep på ung mann: – Blei dregen ut av bilen sin
Fredag måtte politiet rykka ut etter at utanforståande hadde blitt vitne til ei valdshending i Husnes sentrum.
Meldinga, som kom rundt klokka 23 fredag, altså 3. juledag, gjekk ut på at to unge menn både slo og sparka ein annan ung mann.
– Den fornærma i saka skal også ha blitt dregen ut av bilen sin. Patruljen kom fort til staden og fekk kontroll på situasjonen, seier politistasjonssjef Sigurd Børve.
Annonse
Mannen blei frakta til legevakt for vidare sjekk. Det hadde etter omstende gått greitt med den fornærma, som ikkje hadde fått brotskadar eller andre alvorlege skadar etter hendinga.
– Det dreidde seg om mellom anna slag og spark mot ansiktet, legg Børve til.
To mistenkte
Politistasjonssjefen fortel at dei har fått utpeikt kven dei to personane skal vera, og at det er oppretta sak etter hendinga. Vidare held politiet no på med avhøyr av fornærma, vitne og dei to mistenkte. På spørsmål om kva som har vore motivet for hendinga, ønskjer ikkje Børve å svara nærare på dette no.
Annonse
– Det er ikkje ein relasjon mellom dei mistenkte og den fornærma, legg han til.
Alle tre er heimehøyrande i Kvinnherad.
