To klager på vedtaket der Leif Sverre Enes vart «frikjent»
Sjølv om Leif Sverre Enes vart «frikjent» i forvaltningsutvalet, er ikkje saka om bubilparkeringa på Ænes ferdig. Det har kome inn to klager, og i den eine vert det hevda at Enes snakka usant om at han stansa parkeringa etter at pålegget frå kommunen kom. Enes seier derimot at han gjorde som han fekk beskjed om.
Publisert
Sist oppdatert
Tidleg i juli fekk Leif Sverre Enes brev frå kommunen med pålegg om omgåande stans av bubilparkering på to av tomtene hans på Ænes. Han vart òg ilagt dagmulkt på til saman 4.500 kroner. Som Grenda har skrive før var Enes djupt usamd både i vedtaket og i kommunen sin framgangsmøte. Han sendte difor inn klage, men kommunen heldt på sitt.
Difor kom saka opp til handsaming i forvaltningsutvalet den 4. oktober. Høgre-politikarane Vegard Bjørnevik og Guttorm Røssland føreslo der å gjera kommunen sitt vedtak ugyldig, sidan Enes ikkje vart varsla om ei synfaring på førehand. Dei meinte dessutan at det ikkje var bevist noko brot på Plan- og bygningslova, og at det såleis ikkje var grunnlag for tvangsmulkt. Forslaget vart vedteke med fire mot éi røyst.
Annonse
No har to privatpersonar sendt inn klage på vedtaket i forvaltningsutvalet. Kommunen har bedt Leif Sverre Enes om uttale til klagene før dei handsamar saka vidare. Fristen er sett til 17. november.
Beviseleg feil
Medan den eine klagen er kortfatta, er den andre ganske omfattande, og inneheld det som skal vera bevis for at kaien på Ænes vart brukt til bubilparkering også etter 4. juli, som var datoen for kommunen sitt pålegg.
«Ikkje berre er det uttrykk for slett politisk behandling og manglande respekt for eigen administrasjon si handsaming av saka i forkant», vert det innleia i klagen.
Annonse
Vedkomande meiner det er skuffande at politikarane tok forklaringa frå Enes for «god fisk», og hevdar dessutan at eit sentralt premiss for vedtaket er feil. Premissen er at Enes skal ha stoppa bubilparkeringa.
«Det er beviseleg feil, det var nett det Leif Sverre Enes ikkje gjorde. Det vart ikkje opphøyr, men framhald av «bubilcamp» ved elveosen. Det gjaldt heile juli og august», heiter det.
Klagar meiner det mest alvorlege er at Enes var fungerande ordførar i Kvinnherad i denne perioden, og at han ved si framferd har undergrave sakshandsamarar og avdelingsleiarar sin autoritet.
«Dette gjer det heile meir alvorleg, og er med på å svekka tilliten til politikarar generelt», står det vidare.
Tok ned plakatane
Leif Sverre Enes seier til Grenda at han håpa saka var ferdig, men konstaterer at så ikkje er tilfelle. Skuldingane om løgn kommenterer han slik:
Annonse
– I pålegget frå kommunen stod det ikkje noko om kva eg skulle gjera. Difor ringte eg til sektorleiar Anbjørn Høivik for å høyra. Han sa at om eg tok ned plakatane som viste at det var bubilparkering der, så var det greitt. Og det gjorde eg. Eg har aldri sagt at eg avslutta bubilparkeringa, men eg gjorde som eg fekk beskjed om av kommunen. Eg ville jo ikkje jaga nokon frå å parkera der, for behovet for slike parkeringsplassar var stort, seier han.
Enes reknar med Høivik kan stadfesta denne historia. Dessutan meiner Enes han har eit bevis.
– Det beste beviset er jo at kommunen ville påleggja meg 4.500 kroner i dagmulkt, altså 135.000 kroner i månaden, om eg ikkje følgde pålegget. Slik dagmulkt har eg aldri fått, opplyser han.
Når det gjeld dei som har klaga, seier Enes:
– Av og til bør ein kikka ned i eigen mjølpose for å sjå kor rein den er. Elles merkar eg meg at dei ikkje har klaga på fakta i saka, berre på at eg skal ha fare med løgn. Men heile poenget er som nemnt at eg gjorde som eg fekk beskjed om av kommunen.
Ikkje overtydd
Annonse
Leif Enes Enes understrekar også at han ikkje er sikker på at bubilparkeringa i det heile var ulovleg.
– Det er jo dette som er hovudstriden. Hittil har ingen overtydd meg om at det ikkje var lovleg å driva bubilparkering i to månader i sommar utan å søkja. Men eg måtte jo forhalda meg til det som kom frå kommunen, for eg kunne ikkje risikera å måtta betala 135.000 kroner i dagmulkt kvar månad, seier Enes, som elles meiner saka er drege ut av alle proporsjonar.
