To jaktvald får skyta hjort no

Både Hatlestrand jaktvald og Åkra hjortevald har fått løyve til å starta jakta allereie i sommar.

 

Åkra hjortevald søkte i slutten av juni om å få skyta hjort.

– Vi er mykje plaga av hjortedyr som kjem ned på bakkane våre som vi har dyrka på vår utmark, Lessmerreset cirka 400 meter over havet. Avlinga vår her blir nesten halvert kvart år på dei 20 dekara som vi har dyrka i fjellet, skreiv Arild Kvame, som ynska å fella fire dyr.

Kommunen sa ja til søknaden, på vilkår av at dyra skal fellast på skadestaden eller like ved. Det dreiar seg berre om ungkoller og bukkar. Løyvet gjeld fram til 15. august. Skotne dyr vil gå til frådrag i den ordinære fellingskvoten.

Hatlestrand jaktvald søkte i førre veke om å få ta ut ti dyr frå 1. august.

– Grunngjevinga er at dyra kjem så seint inn på innmark og går ut igjen veldig tidleg, så vi er avhengige av å nytta dagsljoset (nattljoset) medan vi har det, skreiv Kjell Aage Ekeland.

Kommunen godkjente å ta ut ti ungkoller og bukkar i perioden 1. august til 28. august. Også her vil talet felte dyr gå til frådrag i den vanlege kvoten.