To elevar sendte til sjukehus – ikkje livstrugande skadde

To skuleelevar er sendte til sjukehus med ambulanse etter akeulukka i Fjellhaugen.

Denne veka er det skidag for dei fleste skuleelevane i Kvinnherad. I dag fekk dei diverre ei oppleving dei helst skulle vore forutan.

– Politiet fekk melding om ei akeulukke i trekkområdet i Fjellhaugen. Fleire skular er representerte der i dag. To elevar har aka i lag, og har på ein eller annan måte blitt skadde. No er dei nett sendte til sjukehus, opplyser politistasjonssjef Sigurd Børve til Grenda klokka 11.40.

Han ynskjer ikkje å seia noko om årsak og skadeomfang, men understrekar at tenåringane ikkje er livstrugande skadde. Skulen dei tilhøyrer er varsla. Både politi, brannvern og ambulanse rykte ut.

Ikkje nødvendig

Børve avviser elles opplysningane til BT om at den eine er henta med luftambulanse.

– Det vart vurdert å nytta helikopter, men legen konkluderte at det ikkje var nødvendig. Men dei blir sendte til sjukehus for vidare behandling og oppfølging. Elles var personell frå Røde Kors allereie på staden i samband med skidagen, seier Børve.

Det er fire skular som er i Fjellhaugen i dag: Rosendal ungdomsskule, Hatlestrand skule, Uskedalen skule og Sunde skule.