To år sidan invasjonen: – Leve Ukraina!

På to-årsdagen for invasjonen reiste presidenten for Europakommisjonen, Ursula von der Leyen, til Ukraina sin hovudstad Kyiv.

– Eg er i Kyiv for å markera toårsjubileet for Russland sin krig mot Ukraina. Og for å feira det ekstraordinære motet til det ukrainske folket, skreiv ho på X.

I Norge vert det markeringar utanfor Stortinget og gjennom 50 arrangement over heile landet, opplyser NRK.

NATO sin generalsekretær, Jens Stoltenberg, publiserte ein uttale om krigen laurdag føremiddag. Der innleiar han med å heidra alle dei modige ukrainarane som har mista livet eller blitt skadde i forsvaret av deira heimland.

«Situasjonen på slagmarka er framleis ekstremt alvorleg. President Putin sitt mål om å dominera Ukraina har ikkje endra seg, og det finst ingen indikasjonar om at han førebur for fred. Men vi må ikkje mista motet», skriv han.

Med i NATO

Stoltenberg viser til at Ukraina ikkje kollapsa i løpet av nokre veker, slik mange frykta. I staden har dei teke tilbake halvparten av territoriet som Russland greip til seg. Ukraina har også pressa Russland vekk frå store deler av Svartehavet, og påført dei russiske styrkane store tap.

«Og ikkje minst, Ukraina har behalda sin fridom og uavhengigheit», slår NATO-sjefen fast.

Jens Stoltenberg trekkjer fram at NATO-landa berre dei siste dagane og vekene har annonsert nye hjelpepakkar verdt fleire milliardar dollar. Dette omfattar mellom anna ammunisjon, luftforsvar, stridsbåtar, utstyr og reservedelar til F-16-fly, og dronar. Meir støtte er på veg.

«President Putin starta denne krigen fordi han ynska å stenga døra til NATO og nekta Ukraina retten til å velja sin eigen veg. Men han har oppnådd det stikk motsette, Ukraina er no nærare NATO enn nokon gong. Ukraina vil bli medlem i NATO. Det er ikkje eit spørsmål om viss, men om når. Medan vi førebur oss på den dagen, så vil NATO halda fram med å støtta Ukraina. For deira sikkerheit og for vår», understrekar Jens Stoltenberg.

Utruleg stolt

Ukrainas president Volodymyr Zelenskyj slår laurdag fast at landet vil vinna krigen.

«Store menneske i eitt fantastisk land! Eg er utruleg stolt over alle. Alle normale menneske vil at krigen skal ta slutt, men ingen av oss kjem til å la landet vårt ta slutt», skriv han ifølgje NRK på Telegram.

I Kvinnherad er det ikkje planlagt markeringar, så vidt Grenda kjenner til. Men det er framleis mogleg å levera klede, sko og anna utstyr til THK-stiftelsen sitt lager i Uskedalen. Ei ny hjelpesending skal nedover i løpet av våren. Stiftinga si eldsjel i Kvinnherad, Tormod Myklebust, skriv på Facebook: «Leve Ukraina», og slår fast at dei må få vera herre i eige hus.