Tips til tiltak før og etter uvêret

Ei ny undersøking Ipsos har gjort for Gjensidige viser at éin av tre nordmenn har opplevd styrtregn, og frykter å få huset sitt overfløymd. Heile 4.200 personar svarte i undersøkinga. Nesten halvparten av Norges befolkning er meir bekymra for ekstremvêr no enn for eit par år sidan. Slikt vêr kan resultera i omfattande skadeverk.

– Ein kjellar er ofte innreia, og ved store vasskadar kan skaden fort koma opp i fleire hundre tusen kroner. Ein del bur utsett til, og opplever at styrtregn gjer skade igjen og igjen. Ei av årsakene til dette kan vera beliggenheit, og ikkje minst underdimensjonerte avløpssystem som er kommunane sitt ansvar, seier Arne Voll, kommunikasjonssjef i Gjensidige, i ei pressemelding.

Stadig oftare tek overvatn nye vegar og råkar stader som aldri har opplevd dette før.

– Ekstremvêr med kraftig regn og vind kan gje store og mange skader. Slikt ekstremvêr blir ofte gitt raudt farenivå, som er det høgaste varslingsnivået. Myndigheitene oppmodar om stor varsemd ved ferdsel utandørs under slike vêrtilhøve. Spesielt viktig er det å unngå å køyra gjennom område med overvatn, ettersom det kan vera vanskeleg å vurdera vassdjupna. Om mogleg, vert det tilrådd det å halda seg heime dersom reisa ikkje er strengt nødvendig, seier Arne Voll.

– No er vi i beredskap for det som måtte koma av skademeldingar det neste døgnet, legg han til.

Før

Gjensidige har nokre råd om kva folk bør gjera før regnet kjem.

1. Les oppdatert vêrvarsel.

2. Stå på bakken og sjå etter openberre lekkasjar på taket, som for eksempel øydelagt takstein eller beslag. Tilkall fagperson om du ikkje sjølv kan reparera dette på ein trygg måte.

3. Om det plar samla seg mykje vatn nær huset, kan ein grava grøfter eller på annan måte leia vatnet bort frå bygningen. Det finst også røyr som kan koblast på nedløp til takrennene, slik at vatnet kan leiast bort mellombels. Sjølv ei ny drenering kan med fordel «skjermast» for mest mogleg vatn ved ekstremnedbør.

4. Sikre lause gjenstandar som trampolinar, søppelkassar og utemøblar.

5. Om det kjem vatn frå taket kan dette samlast opp i bøtter, kjelar og liknande, men taklekkasjar skal ikkje utbetrast under eit uvêr.

6. Kjem det vatn inn i kjellaren kan du bera opp gjenstandar og slå av sikringa.

7. Ved tilbakeslag frå sluk, legg på ein stein innpakka i eit handkle for å avgrensa tilstrøyminga av vatn.

Etterpå

Etter uvêret ber forsikringsselskapet om at eventuelle skader raskt blir meldt inn. Ei lita sjekkliste:

1. Sjekk om vatn har trengt inn i bustaden.

2. Om du finn lekkasjar, prøv å fjerna vatn og tetta det mellombels.

3. Sjekk båten, kanskje må den lensast eller fortøyingar og kalesjer må justerast.

4. Meld frå til forsikringsselskapet om skader, men ver førebudd på unormal ventetid – det kan vera mange som skal melde frå.