– Tippar me blir utseld
Vêrvarselet syner sommar og sol så langt auga kan sjå, og Festidalen stiller med eit program som kan skilta med knallsterke artistar på rekkje og rad. Slikt gjev ikkje berre sommarkjensle, men også eit rekordgodt førehandssal til den populære festivalen.
– I fjor hadde me vårt absolutt beste år, både når det gjaldt mengdemessig og førehandssalet. Men i år ligg me godt over det, og det er veldig positivt. Me er veldig nøgde med programmet i år, det er eit program som treff både breitt og godt, fortel ein strålande nøgd Daidalos Dahle.
– Me ligg veldig godt an, og eg tipper at me blir utseld, legg han til.
Annonse
Jubileum
Ikkje berre ligg det an til å bli eit rekordår for Festidalen, i år feirer dei også 20-årsjubileum. Noko Dahle fortel at dei har vore bevisste på under planlegginga av årets program.
– Det er ikkje mange festivalar i vår skala ute i periferien som overlever i så mange år. Eg trur folk verkeleg skjønar den kulturelle verdien og samfunnsnytta ein slik samlingsplass har. Det er også mange som vel å koma heim til den helga, og det talet aukar frå år til år, fortel Dahle.
– Slike ting tek tid å bygga opp, men me ser at det gjev løn til slutt. Me har vore tålmodige og halde ut i tunge stunder, og me er stolte over at me no kan feira 20-årsjubileum, fortset han.
Annonse
På spørsmål om det blir ekstra feiring og markering i år er han litt tilbakehalden på.
– Eg vil ikkje sei for mykje om det, det må me sjå lite grann an. Derimot så har me valt å syna det litt gjennom programmet. Nokre av dei som var med og spela fyrste året er tilbake i år. I tillegg så har me gjort fredagen til ein liten hyllest til slik Festidalen starta og det den står for, med rocken som eit klart kjernepunkt. Laurdagen er meir designa for å syna den moderne Festidalen som også fylgjer dagens musikkbilete, forklarer Dahle.
– Me skal alltid ha med oss rocken, men me tek også med oss nye ting som kjem på vegen. Det kjem alltid til å koma bølgjer mot oss, dei bølgene er me førebudd på og dei vil me ri, samtidig som me held kjernen tett til brystet, fortset han.
