Tiltalt bilist: – Det peip i aircondition-anlegget i bilen. Eg prøvde å fiksa det. Då eg heva blikket small det

– Før eg startar så har eg berre lyst til å beklaga meg. Eg føler veldig med vener og familie av Emma. Hadde eg hatt mogelegheit så skulle eg gjort kva som helst for at ulukka ikkje hadde skjedd.

Slik opna 21-åringen forklaringa si i Haugaland og Sunnhordland tingrett onsdag.

I forklaringa hennar kjem det i tillegg fram at avdøde på ulukkestidspunktet skal ha vore blant tiltalte sine beste venninner.

– Eg hadde ikkje kjent henne så lenge, men me hadde fått eit nært forhold.

Gledde seg

21-åringen fortel at den skjebnesvangre dagen, 19. juli i fjor, starta på best mogeleg vis. Ho gledde seg til å treffa ei venninne det var lenge sidan ho hadde sett. Mellom anna gjekk turen til Peppes Pizza på Husnes.

Då kvelden kom hadde ho eit ærend hos far sin. På fylkesveg 5024 ved Knappenestunnelen i Matre i Kvinnherad, ein vegstrekning ho har køyrt mange gonger, går det gale.

– Eg høyrte piping frå aircondition-anlegget i bilen. Eg sleppte høgre handa frå rattet og prøvde å slå anlegget av. Men eg trykte på feil knapp. Eg tok blikket frå vegen, fann rette knappen å trykte på. Då eg heva blikket igjen så var det for seint. Då small det, fortel 21-åringen.

Feil køyrefelt

Ifølgje tiltalen har 21-åringen kome over i venstre køyrefelt, der ho har krasja front mot front med Weberg Kaldestad som kom på sin Yamaha moped. 18-åringen omkom på staden, som følgje av knusingsskadar etter samanstøyten.

21-åringen fortel at ho meiner at ho var i rett køyrefelt då ho såg ned for å skru på aircondition-anlegget.

– Men eg heldt rattet med venstre hand. Då eg lena meg over til høgre, kan rattet ha gått mot venstre, forklarar ho.

Kjempar mot gråten

Den tiltalte 21-åringen kjempar mot gråten under forklaringa si, men er fast bestemt på å forklara seg for retten.

– Etter samanstøyten var ting veldig uklart for meg. Eg hugsar berre at eg såg opp, og så small det. Det var masse røyk og glasbitar, og airbagen hadde løyst seg ut. Eg gjekk ut av bilen og sprang ned for å sjå kven eg hadde krasja med, seier ho.

– Gjorde du deg nokre tankar om korleis dette kom til å gå, då du såg Emma etter ulukka? spør aktor Ørjan Ogne.

– Ja. Eg håpa inni meg at det kom til å gå bra. Men ein annan del av meg visste at det ikkje kom til å vera tilfelle, svarar 21-åringen.

– Krise

21-åringen fortel at ho ringte til ambulanse. Då den første bilen kjem til åstaden tek ho kontakt med føraren i denne.

– Eg sa at dei måtte koma og hjelpa meg, for at det var krise. Eg fekk veldig god hjelp, og eg fekk overlevert telefonen min til føraren av den første bilen, då eg ikkje var i stand til å snakka med ambulansen sjølv, seier ho.

I forklaringa hennar går det fram at vegen ved ulukkesstaden er av det smale slaget.

– Kva tenkjer du om at du tok blikket frå vegen, for å skru på aircondition-anlegget? spør aktor Ogne.

– Eg burde ha stoppa, eller oversett det.

Har det hendt før, at du har valt å stoppa for å skru på luftanlegget?

– Nei, svarar kvinna.

Ifølgje tiltalen skal 21-åringen hatt ein fart på mellom 91 og 103 km/t då samanstøyten skjedde.

– Ikkje synd på meg

21-åringen fortel at ho ikkje ønskjer at folk skal synast synd på henne.

– Mine kjensler kan ikkje samanliknast med korleis Emma sine pårørande har det. Eg har vore heldig, eg har foreldre som har pusha meg ut dei dagane eg helst har hatt lyst til å grava meg ned i senga. I tillegg har eg kjekke venninner som har teke meg med ut, seier ho.

Ho forklarar også at ho har gått til psykolog, og er blitt diagnostisert med posttraumatisk stressyndrom, angst og depresjon.

– Korleis har dette påverka det sosiale livet ditt, og skulegang?

– Eg har veldig mykje fråvær. Enkelte dagar har det vore nok å klara å gå i dusjen. Eg har helst hatt lyst til å berre liggja i senga, heilt åleine.

Haugaland og Sunnhordland tingrett har sett av tre dagar til rettssaka.