Tilstandsrapporten for Brekke skule på Borgundøy ligg klar
Etter at kommunen vedtok å selja den gamle skulen på Borgundøy vart takstmannen Jens-Tore Engevik i Vitre førespurt om å utarbeida ein tilstandsrapport.
Publisert
Sist oppdatert
Brekke skule vart oppført rundt 1938. Trehuset, som har to etasjar, kjellar og eit kaldloft, ligg tett ved Fjelberg bygdahus.
I førespurnaden som vart sendt til takstmannen frå kommunen 6. september kunne ein mellom anna lesa følgjande:
Annonse
«Ved sal av bygget kan lokalmiljøet få moglegheit til ein samlingstad som kan utviklast på eigne premissar, eller at andre aktørar kan sjå moglegheit å utvikla eigedomane for næringsformål og utvikling.»
Fuktskadar pregar bygget
10. oktober var tilstandsrapporten frå staden utført, og konklusjonen er ganske sørgjeleg lesing, kor fleire lekkasjar, fuktskadar, råte, borrebille-angrep, muggsopp, og omlegging av skifertak samt nytt sutak er blant tiltaka som blir anbefalt.
«Bygget ber preg av at det har stått lenge ubrukt og det trengs meir jamleg vedlikehald samt renovering av takkledning, vindauge og grunn. Det er stor sannsynlegheit at det er skjulte skadar i vegg og golv etter lekkasjar», skriv Jens-Tore Engevik i rapporten.
Annonse
Punktvis er det lista opp fleire ting som krevst utbetringar. Desse knytt til taket, grunnen, 1. og 2. etasje og kjellaren, kaldloftet, tilstøytande bygg, lister og kledning, samt det tekniske anlegget.
Engevik meiner at det ikkje er økonomisk forsvarleg å renovera bygget. Han peikar vidare på at kostnadane med oppvarming vil bli enorme slik energiprisane er i dag.
«Det må vurderast å sanera bygget. Området er regulert til skule/offentlege formål. Ved evt. sal må dette omregulerast», sluttar han rapporten.
