Tilsett som journalist i Grenda

Grenda har fått ein ny journalist i staben; Gina Eriksen Albrethson frå Halsnøy.

Ho vaks opp i Haugesund, men flytta til Omvikdalen som 12-åring.

– Både Mamma og Pappa vaks opp i Kvinnherad, men er strengt tatt innflyttarar begge to, fortel Gina Eriksen Albrethson.

28-åringen, som har ei dotter på seks år, bur no i Toftevågen, i eit nyoppussa hus.

– Vi har prøvd å gjera det eldre enn det er, så det er gjort i gamal stil, opplyser ho.

Journalisterfaring fekk ho tidleg, og faktisk i Grenda. Ho var nemleg innom redaksjonen vår i samband med Operasjon Dagsverk. Deretter fortsette karrieren på spesielt vis.

– I 9. klasse vann eg ein draumedag gjennom organisasjonen MOT, og fekk vera i redaksjonen til både BA (Bergensavisen) TV 2. Då var det journalistdraumen verkeleg skaut fart, fortel Gina.

Men det var likevel ikkje journalistikk ho valde då ho skulle studera. I staden vart det arkeologi og kunst, så ein kan trygt seia at spennet er stort.

– Eg er ein person som har veldig mange ting som interesserer meg. Då tenkte eg at journalistyrket må vera det rette, for der er ein innom det meste, seier ho.

Gløymde minnekortet

I 2019 fekk ho sommarjobb i Kvinnheringen. Starten vart litt uheldig, ettersom det aller fyrste oppdraget kravde at ho måtte køyra til Åkra. Vel framme oppdaga ho at minnekortet til fotoapparatet låg igjen på kontoret. Men takka vera dåverande Grenda-journalist Marius Nissestad, som var sendt på same jobben, fekk ho teke dei nødvendige bileta.

Etterpå vart Gina tilsett i eit vikariat i Sunnhordland, før ho i desember 2019 blei fast tilsett i Kvinnheringen. Men sommaren 2022 følte ho tida var inne for å studera meir, og då var det app-design som freista. Dei siste par åra har ho også vore frilansjournalist for Egmont, og levert stoff til magasin som Lev Landlig og Hytteliv.

– Det var veldig stas å kunna skriva lokale saker og sjå dei på trykk på glanspapir. Men så er det noko med at å vera sjølvstendig næringsdrivande blir fort litt einsamt. Spesielt for meg som likar å vera rundt folk. Så då Grenda lyste etter journalist, var eg ikkje i tvil, seier Gina Eriksen Albrethson.

– Kva tenkjer du om å bli journalist på fulltid igjen?

– Eg ser veldig fram til det, og til å vera blant kollegaer igjen og å koma meg ut blant folk. Ikkje minst blir det veldig kjekt å reisa rundt i kommunen og møta nye menneske, seier ho.

Kreativ

På fritida likar Gina Eriksen Albrethson å driva med kreative ting. Ho kosar seg med å laga illustrasjonar, måling og teikning. Ho tek også på seg oppdrag innan desse felta.

– No i samband med jula er det mykje dekorasjonar i vindauga det går i, smiler Gina, som også kan skilta med A-lags kampar for damelaget til Rosendal. Men fotballkarrieren vart tidleg avslutta, og ho la opp som 16-17-åring.

Gina Eriksen Albrethson er tilsett i full stilling i Grenda, og hadde sin fyrste arbeidsdag 2. desember.