Tilsett som frivilligkoordinator: – Det blir viktig for å lukkast

– Det var veldig kjekt, rett og slett utruleg gøy å få tilbodet om stillinga. Det er kjekt med ein slik type jobb med koordinering, og eg tenkjer å ta med deg den erfaringa frå min noverande jobb inn i den nye stillinga, sa Monsen.

Framtidsretta og riktig

Stillinga går ut på å koordinera det frivillige arbeidet og forsterka det inn mot einingane i både Rosendal, på Husnes og Halsnøy, og Monsen har allereie fleire tankar om kva ho vil fokusera på.

– Hovudmålsetjinga blir å bidra til at dei eldre får meir innhaldsrike dagar og breiare tilbod på sikt, også med litt meir individuelt tilpassa aktivitetar. I tillegg ynskjer eg at dei skal få meir samvær med andre utanfrå, då gjerne frå ulike organisasjonar som kunne tenkja seg meir frivillig arbeid, fortalde den nye koordinatoren.

– Eg tenkjer å skapa eit miljø som er litt meir inkluderande på eininga, at det skal vera kjekt for frivilligheita å vera til stades og bidra på arrangement. Eg vil også vera påpasseleg på å ta i bruk heile året, rett og slett laga eit årshjul som gjer at dei eldre kan fylgja året og årstidene. Då gjerne med ulike aktivitetar knytt opp til det, fortset ho.

Monsen seier at tanken er at ho skal vera med og forma stillinga etter kvart. Ho er også glad for at kommunen satsar på ei slik stilling.

– Det at dei ynskjer å bruka ein koordinator som berre er avsett til koordinering er både framtidsretta og riktig. Det er jo mange frivillige som er inne på sjukeheimane som gjer ein kjempejobb for dei eldre, men dei har også tilbod i kommunen som ikkje er direkte retta mot eldre som dei likevel kunne vore ein del av, poengterer ho.

Viktig for å lukkast

Monsen fortel vidare at ho var midt i mellom ei prosjektleiarstilling som går ut til hausten, og at ho allereie var i tenkeboksen då utlysinga til denne stillinga plutseleg dukka opp.

– Det var jo midt i blinken for meg no. Eg har litt erfaring eg kan ta med meg, i tillegg så er det dette med nettverk. Eg likar å jobba med nettverksbygging, noko som vil bli viktig for denne jobben. Ein annan ting er å ta vare på dei som allereie er frivillige, det blir viktig for å lukkast. Det skal vera kjekt å vera frivillig, og er noko eg håpar at eg kan bidra med, sa ho.

– Eg ynskjer også at dette skal vera ein utoverretta jobb der eg er mest mogeleg ute i einingane. I fyrste omgang blir eg fordelt på dei tre einingane i Rosendal, på Halsnøy og Husnes. Det vil også vera viktig med ein god dialog med dei tilsette. Dei kjenner brukarane og ser kva ulike behov som trengs på dei ulike avdelingane, slik at me kan tilretteleggja best mogeleg, la ho til.

Monsen tiltrer i stillinga i september.