Tilrår omkøyring via Jondal - problem med thruster og mannskapsmangel
Fredag ettermiddag er det framleis store problem på sambandet Gjermundshamn-Årsnes. Fjord1 tilrår no folk å heller nytta Jondal-Tørvikbygd.
Publisert
Sist oppdatert
Torsdag kveld starta problema på ferjesambandet Gjermundshamn-Årsnes. Rute 1, altså «Sildafjord», skal etter det Grenda fekk høyra av folk som stod i køen og venta, ha fått maskintrøbbel.
Problema er enno ikkje løyste, og klokka 14.42 fredag ettermiddag kom Fjord1 med ei ganske uvanleg oppmoding. «Grunna vedvarande driftsproblem blir omkøyring via Jondal-Tørvikbygd anbefalt».
Annonse
Fjord1 skriv ingen ting om at reserveferje vil bli sett inn. Grenda tok difor kontakt med regionleiar Tor Kristoffersen for å høyra kva som føregår.
Allereie oppteken
– Vi har ein thruster på «Sildafjord» som vi ikkje kan gå vidare med. Vi må fyrst skifta ein del på thrusteren. I tillegg har vi ikkje mannskap til å bemanna reserveferja, og den eine reserveferja er uansett allereie oppteken med anna oppdrag, seier han.
– Kva tidshorisont snakkar vi om?
Annonse
– Vi håpar å få på plass reserveferje i morgon, og at «Sildafjord» kan vera i drift igjen på søndag. Men kanskje er det optimistisk, fortel Kristoffersen.
– Vi får håpa det ordnar seg snart, kommenterer Grenda.
– Det håpar vi og, avsluttar regionleiaren.
