Tilrår nedlegging av to klassar på KVV

I sommar har ein ny, heilskapleg plan for tilbodsstruktur i vidaregåande opplæring lege til høyring hjå fylkeskommunen. No har fylkesdirektøren sett på høyringssvara, og legg fram ei tilråding. I denne tilrådinga ligg mellom anna ei nedlegging av Fitjar VGS i 2030 når 2. byggetrinn for Stord VGS på Vabakkjen skal stå ferdig. Faga ved Fitjar VGS vil då overførast til Stord VGS, unntatt linja for Frisør, blomar, interiør og eksponeringsdesign, som vert lagt ned.

Kvinnherad VGS får ikkje sleppa unna endringar, som det kunne sjå ut til i det opphavelege høyringsforslaget. Ein av dei to studiespesialiserings-klassane og ein klasse for teknikk og industrifag (vg1) bør leggjast ned i 2029, står det å lesa i Fylkesdirektøren sitt forslag til tilbodsstrukturen i Vestland.

Ingen dramatikk

Rektor Morten Vevatne er korkje overraska eller uroleg.

– Det ligg ingen dramatikk i dette. Dette er ei naturleg nedjustering på grunnlag av nedgangen i elevtal i åra som kjem. Neste år blir nok også eit år med bra antal elevar, men om 4-5 år vil det vera langt færre 16-åringar her i kommunen, seier rektoren.

Tal frå fylkeskommunen stadfestar dette. Kvinnherad står no oppført med 500 ungdommar mellom 16 og 18 år. I dei to neste åra verkar talet å vera stabilt, og til og med aukande. Men i 2035 er talet estimert å gå ned til berre 373 ungdommar i denne alderen. Nedgangen i elevtal er gjengs for heile fylket, og er ein av årsakene for endringsbehov i tilbodsstrukturen.

Naturleg avgang

– Det som er alvorleg her, er sjølvsagt nedgangen i folketalet. Her må me jo gjera eit arbeid i fellesskap for å folk til kommunen – ikkje berre dei som skal stifta familie, men også familiar med ein trettenåring, meiner Vevatne.

Rektoren er heller ikkje uroa over om dette får konsekvensar for personalet.

– Nei, sidan dette ikkje skal skje før i 2029, er det fullt mogleg å laga ein heilskapleg og god plan for reduksjonen. Det vil til dømes vera noko naturleg avgang før den tid, forsikrar han.

Vil ikkje mista mangfaldet

Ordførar Vegard Bjørnevik ser heller ikkje mørkt på situasjonen.

– Me må visa at Kvinnherad er ein attraktiv plass å bu. No har me til dømes redusert levekostnadane her, og me må halda fram med å gjera kommunen god for tilflyttarar, seier han.

Om nedlegginga av Fitjar VGS, seier ordføraren:

– Det viktigaste er at me ikkje mister mangfaldet av linjer i regionen. Eg ynskjer til dømes at dei kreative linjene framleis skal vera tilgjengelege for ungdommar her.

Dette er det fleire enn Bjørnevik som meiner. Enkelte fag som var føreslege nedlagt i høyringsforslaget, har blitt teke inn att i planen, som musikklinja og medialinja på Stord VGS. Dette skuldast truleg høyringsuttalar som har blitt sendt inn i prosessen.

Tilrådinga frå fylkesdirektøren skal opp i hovudutvalet for opplæring og kompetanse 28. august. Så skal saka handsamast i ulike utval utover september, før Fylkestinget gjer eit vedtak i saka 1. og 2. oktober.