Tilbyr service på båt
Husnes pit-stop service har fått Oddvin Hefte med på laget, og utvidar no tilbodet med service på båtmotorar.
Med sin mobile verkstad ynskjer dagleg leiar Ronny Teigen og anleggsmaskinreparatør Oddvin Hefte å sjå om det finst ein marknad for å driva med båtservice her i kommunen.
– Noko vi trur det er. Slik det er i dag er det ingen her i Husnes-området som driv med slikt. Og vi har vore i kontakt med dei ulike båthamnene her i nærleiken, og dei har berre lovord å koma med om initiativet, seier Teigen.
Artikkelen held fram under annonsen.
Utfordrande vinter
Sidan Ronny starta opp i 2003, har bilverkstaden vore i kontinuerleg vekst. Og no når dei feirar ti-årsjubileum oppe på Reset, satsar dei på å auka ytterlegare. No kan dei nemleg ta på seg alt frå service og reparasjon av små påhengsmotorar til større innanbordsmotorar på fritidsbåtar.
– Til å byrja med er dette eit prøveprosjekt der Oddvin går inn i ei deltidsstilling, men om marknaden er så god som vi trur, vil vi kanskje utvida, seier Ronny.
Utfordringane er berre å få det til å gå rundt heile året.
– Vinteren er problemet. Det å driva med båt er veldig sesongtungt. Før våren kjem og sola stikk fram, er det ingen som veit at dei eig båt. Men marknaden er der, det er berre for oss å få folk til å vita at vi no tilbyr desse tenestene, seier Oddvin Hefte og får medhald hos sjefen.
– Ja, om sommaren så kan det bli snakk om eit kapasitetsproblem, der vi fort kan ha for mykje å gjera, medan det på vinteren kan bli utfordrande. Men i Oddvin har vi no kompetansen og kunnskapen på plass, for fyren blei nesten fødd i ein båt, ler Ronny.
– Eg blei ikkje fødd i ein båt, men det er jaggu ikkje langt ifrå, svarar Oddvin.
Artikkelen held fram under annonsen.
Traktorar
Og om vinteren skulle bli eit for stort problem, sit Teigen på løysinga på problemet.
– På sikt kan det vera aktuelt å utvida tilbodet ytterlegare og starta opp med service på anleggsmaskinar, traktorar og plenklipparar. Men no får vi fyrst sjå korleis dette går, det vil nok utvikla seg med tida, men vi byrjar no i det små, sluttar Ronny Teigen.