Tilbyr opplevingar frå heile verda
Saman med reisebyrået Topp Afrika AS startar Andreas Antonsen frå Kaldestad opp reiseselskapet Ekspedisjonsreiser AS, og vil over nyåret tilby eitt breitt spekter av opplevingsreiser frå heile verda.
Publisert
Sist oppdatert
– Endeleg er det klart. Eg har gått å venta ein månad på å koma ut med dette og fekk organisasjonsnummer og slikt på måndag. Og vil frå tidleg januar av vera oppe med ny nettside og klar for full rulle, seier Andreas Antonsen.
Draumejobben
Annonse
Eigentleg hadde den eventyrlystne 24-åringen planar om å leggja ut på store ekspedisjonar i desse tider. Men langvarig sjukdom etter at han returnerte frå Indonesia tidlegare i år, har gjort at det ikkje blei mogleg. Han har difor gått å leita etter jobb i Bergen den siste tida, og bestemte seg til slutt for å skapa sin eigen arbeidsplass.
– Topp Afrika spurte meg om eg ville vera med å skapa noko nytt. Eit spørsmål eg ikkje trengte lang tid på å svara ja på. Eg hadde jo ikkje jobb, og med det ikkje så mykje å tapa. I tillegg gir dette meg sjansen til å jobba med det eg har aller mest lyst til, samstundes som eg har ein solid og erfaren støttespelar i ryggen, seier han.
Det vesle ekstra
Ekspedisjonsreiser AS er ifølgje Antonsen eit tilbod til alle som er lei av den vanlege charterturen til Syden, og som i staden er ute etter det vesle ekstra. Og han lovar at det skal vera turar til alle og ein kvar.
Annonse
– Vi er allereie godt i gang, og har fått våre fyrste bestillingar. Vi skal vera konkurransedyktige i pris, og tilby eitt breitt spekter av ekspedisjonar. Heilt frå dei korte dagsturane på Korsika til lange ekspedisjonar til blant anna Kilimanjaro, seier Antonsen.
Med seg på laget har dei sikra seg lokale guidar på kvart eit reisemål.
– Vi har fått med oss dei beste lokale guidane på lag, og har alt klart i forhold til kven vi skal jobba med på dei ulike stadane. Ved å bruka lokale guidar, så skapar vi både arbeidsplassar fleire stadar i verda og kundane våre den beste opplevinga, så dette blir veldig bra, seier Antonsen.
Sjølv om dei etter kvart har planar om å tilby eitt breitt spekter av aktivitetar, vil det no i starten vera eit større fokus på fjell. I tillegg til Korsika og Kilimanjaro, vil dei tilby trackingturar til Nepal, India og Mongolia.
– Og så blir det ørkenvandring i Marokko og litt anna. Eg gler meg veldig til vegen vidare, og har stor tru på dette her. Sjølv om det er nedgangstider, så reiser folk på ferie. Folk vil oppleva ting, og gjerne noko anna enn Middelhavet. Og det er det vi no skal prøva å tilby, sluttar han.
