Til val for å stoppa auka skilnader

– Korleis får me fram kva som skil oss frå dei andre partia? spør Silje Nordtveit Olsen og Hildegunn Hanstveit Tofte seg sjølve om då dei startar presentasjonen av programmet Kvinnherad SV går til val på i september.

– Stemmer du på SV i Kvinnherad, så skal du kjenna igjen SV nasjonalt, er det første som duoen, som saman med Wermund Vetrhus utgjer toppen av den lokale SV-lista.

Oppvekstkår

– Oppvekstkår var viktigaste sak for oss i førre valperiode, og me fekk støtte for det i samarbeidet me hadde med Ap og Sp. Gratis SFO har vore ein SV-sak både lokalt og nasjonalt, og det er me som har funne fram talgrunnlaget som viser at Kvinnherad hadde tredje dyraste SFO i landet, gjer Olsen og Hanstveit Tofte greie for.

Partiet har også eit sterkt ønske om å få på plass heildagsskule, og ser gjerne at dei får fleire pilotskular på plass enn den eine som er i sving på Hatlestrand.

– For oss er heildagsskulen ein plass der det er varmt måltid kvar dag, lekserepetisjonen gjort på skulen og då leksefri på ettermiddagen. Det er somme som ikkje får nytta seg av SFO, fordi det skyss er knytt til når skulen sluttar, ikkje når SFO-en er ferdig. Me trur heildagsskulen vil redusera forskjellane i Kvinnherad, og me ynskjer like oppvekstkår for barna i Kvinnherad, seier Hanstveit Tofte og Olsen.

Dei står også på barrikadane for kommunale velferdstilbod.

– Me ynskjer ikkje ei privatisering av desse tilboda, konkluderer dei.

Naturvern

– SV ynskjer å bli sett på som framtidsretta. Me ynskjer at barna og barnebarna våre skal oppleva at Norge er sjølvforsynt med tanke på å ta vare på matjord, at me tar vare på strandsona slik at dei som ynskjer å flytta heim kan bada i si eiga bygd. Me er sterk forkjempar for at innbyggjarane skal ha tilgang til dei naturressursane som me har i umiddelbar nærleik. Me seier ja til meir naturvern, seier Hanstveit Tofte.

– Eg syns det er fascinerande med Kom Heim-kampanjen som reklamerer for fjellturar og bading der du vil, og samtidig privatiserer me meir og meir av strandsona, og så trur ein at det gjer Kvinnherad attraktivt å flytta heim til, legg ho til.

Partiet ynskjer å få på plass ei kommunal tiltaksordning for bønder i etableringsfase eller omstillingsfase, og ser på det som eit viktig tiltak for å lokka heim framtidige generasjonar bønder.

– Me har snakka med bondelaga, og det er enorme kostnader for bøndene knytt til å omstilla seg til lausdrift. Samtidig har me mål om å bli det beste partiet for bøndene. Dette er også ein viktig del av tryggleiksberedskapen vår. Som nasjon kan me ikkje driva å importera halvparten av maten me skal eta. Parallelt er Kvinnherad er ein stor landbrukskommune, og me må ikkje byggja ned dyrka mark, seier Olsen.

Eigedomsskatt

Til liks med dei andre partia i Kvinnherad stiller SV seg bak visjonen om å auka til 15.000 innbyggjarar innan 2050:

– Då må me ha noko kjekt å henta dei heim til, meiner Olsen og Hanstveit Tofte.

– No er det 1400 kvinnheringar mellom 70 og 80 år. Dei bidrar ikkje så mykje meir med folketalsauke. Gratis SFO eit av fortrinna for å lokka heim utflytta kvinnheringar. Det er viktigare for oss å auka grunnbemanning i barnehage, skule og pleie og omsorg, enn å droppa eigedomsskatten, seier dei.

SV-toppane peikar på at eigedomsskatten er den einaste mogelegheita til lokal beskatting ein har, og at pengane ein får inn derifrå går rett inn i drifta av kommunen.

– Det er ikkje ønskeleg å ta av kraftfondet til drifta, det vil me heller bruka til investeringar. Eigedomsskatt vil betyr 30 millionar kroner til å setja inn fleire hender i dei nemnde områda, seier Olsen og Hanstveit Tofte kor korleis deira satsing skal finansierast.

Samferdsle

SV gjekk inn for ein større endring i skulestrukturen enn det som blei vedtatt i 2021.

– Me syns vedtaket som vart gjort var korkje fugl eller fisk, då det ikkje tok inn tilrådingar og bekymringar frå administrasjonen si utgreiing. Men så lenge det er sosialt, pedagogisk og fagleg forsvarleg tilbod ved kvar skule, så ynskjer ikkje me å leggja ned skular, seier dei om standpunktet deira.

Dei har ikkje heilt landa på standpunktet på Sunnfast.

– Me er heilt i mot Hordfast, og vil heller prioritera gul midtstripe og rassikring. SV i Vestland er ikkje samstemte om kva ein ynskjer innan samferdsle. Me i Kvinnherad ynskjer ikkje indre trasé, men ynskjer heller å styrka ferja mot E39. Generelt er dette vanskeleg, for det er noko me på kommunalt nivå har lite påverknad på, innser Hanstveit Tofte og Olsen.

– Næringslivet seier at det byrjar å bli vanskeleg å vera konkurransedyktige, for det er så komplisert å koma seg til og frå Kvinnherad. Det må me lytta til. Miljø og naturvern står fremst hos oss, og Sunnfast har store kostnader på den sida. Me har sagt ja til konsekvensutgreiing av Sunnfast, slik at me får alle sider belyst, og dermed veit kva me seier ja og nei til. Det same er tilfelle for ny sjukeheim på Husnes, sluttar SV-toppane.