Til topps for dei tre tømrarane

Dei tre lærlingane, Vetle Aarre Aleksandersen (20), Ole Haukenes Eik (20) og Mats Seljestad Petterson (20), er sjølve svært nøgde med både fagprøveresultata og fast jobb.

– Det var digg å få fast jobb, godt å sleppa og stressa med det, konkluderer Petterson med eit smil.

Dei andre seier seg einige, og skryt av arbeidsgjevaren sin.

– Me har fått vera med på mykje spanande og mykje forskjellig, fortel Ole Haukenes Eik.

– Det har også vore ein veldig trygg stad å vera. Trygge folk ein kan prata med, samtidig har dei også hatt masse arbeid til oss så me har sloppe å stå med nevane i lommene, legg han til.

«Meget godt»

På spørsmål om korleis det var å gjennomføra sjølve fagprøven kan Petterson fortelje at det var ganske stressande.

– Eg klarte likevel å holda hovudet kaldt, og eg klarte å fylgja planen min, så er ganske nøgd med det, fortel han.

Fagleiar ved Byggern Teigen, Even Stensletten, skryt stort av dei tre nytilsette tømrarane.

– Ved ein fagprøve er det både ein teoridel og ein utføringsdel, og etterpå kan ein få anten «ikkje bestått», «bestått» eller «bestått meget godt». Alle desse tre fekk «bestått meget godt», noko som er utruleg godt gjort, skryt Stensletten.

– Dei har vore ein fryd å ha dei alle her, og det har vore enormt kjekt å sjå korleis dei har utfordra seg sjølve og kvarandre til å få toppkarakter. Den interne konkurransen var hard. Då den fyrste fekk «meget godt» påverka det dei hine til å jobba for det same, ler fagleiaren.

Noko også tømrarane sjølve, noko lattermildt, kan bekrefte.

Gode sjansar

Stensletten fortel vidare at dei per dags dato har 2 lærlingar, og at det er viktig å satsa på ungdommane.

– Me har eit veldig godt samarbeid med KVV, og me har mange utplasseringar fyrste og andre året på byggfag. Stor honnør til KVV som klarer å få fram så mange flotte handverkarar, skryt Stensletten.

Fagleiaren fortel også at dei stort sett har jamn og god tilgang på lærlingar, noko han er takksam for.

– Rekruttering av lærlingar er viktig ikkje berre fordi det er generelt stor mangel på handverkarar over heile linja, men også fordi det er ein god måte å få ungdommane våre til å bli verande i kommunen, seier Stensletten.

– Mangel på handverkarar gjev derimot svært gode sjansar for å få seg jobb for dei som tek fagprøven, legg han til.

Likevel meiner han at bransjen er på veg inn i ei rolegare tid framover.

– På landsbasis går nok bransjen inn i ei rolegare tid, men her i kommunen merkar me mindre til det. Me merkar at det er jamt over meir stabilt her i kommunen, fortel han vidare.

Trass i at dei no står med fagbrevet i hendene og kan kalla seg ferdig utdanna tømrarar, er dei alle strengt einige om at ein aldri blir ferdig utlært i eit slikt yrke.

– Det er alltid noko nytt å læra og ein må alltid fylgja med. Dette yrket utviklar seg jamt heile tida, avsluttar Stensletten.