Til Oslo for å belysa kommunale utfordringar

– Me vil jo framheva at kommunane får fleire og meir komplekse oppgåver i tenestene våre, utan at det fylgjer nødvendige midlar med til dette. Det vil me mellom anna ta opp med Hordalandsbenken på Stortinget, som me skal møta tysdag ettermiddag, fortel Vegard Bjørnevik på telefon frå Oslo.

Vil utfordra Energidepartementet

Elles på planen står det å besøka ulike departement. Bjørnevik skal innom Energidepartementet og Næringsdepartementet, medan Leif Ove Mikkelsen vitjar Helsedepartementet og Justisdepartementet. Målet er å snakka med dei ulike departementa om utfordringar for Sunnhordlandskommunane. Ordføraren veit kva han vil snakka om i Energidepartementet.

– Eg vil ta opp skepsisen vår til Statkraft si planlagde effektoppgradering i Mauranger. Skattesystemet er ikkje rigga for det, kommunen kan tapa pengar, og naturinngrep blir ikkje nok kompensert, nemner han.

Sunnhordlandsrådet reiser til Oslo årleg for å treffa forvaltarar og politikarar i departement og Storting. Bjørnevik fortel at det er hans første tur.

– I fjor vart sonen min fødd på denne tida, så då var eg ikkje med. Men eg ser fram til programmet her, seier han.