Til Ølve for kjærleiken
Gløym tilrettelagte bustadfelt og ein blømande jobbmarknad, kjærleiken trassar det meste. I alle fall gjer den det for Tonje Yddal frå Osterøy.
Ser ein vekk frå då ho gjekk landbrukslinja på Voss, har den skriveglade og engasjerte 21-åringen budd heile sitt liv på Osterøy. I trygge omgjevnadar blant familie og vener, men som nyutdanna agronom var unge lovande Yddal klar for nye utfordringar. Det var berre éin ting ho mangla; ein mann.
Men Tonje Yddal, eller «Traktor-Tonje» som ho humoristisk kallar seg, hadde pønska ut formelen for å løysa problemet. Gjennom kombinasjonen av eigen kreativitet og sosiale medium, stelte den unge landbruksentusiasten i stand sin heilt eigne og personlege versjon av TV-favoritten «Jakten på kjærligheten».
Artikkelen held fram under annonsen.
Med tittelen «Gifteklar kvinneleg agronom (21) søkjer mann og gard!» slengte jenta modig ut ein velskriven og humoristisk kontaktannonse på Facebook-gruppa «Venner av norsk landbruk». Eit innlegg som verkeleg slo an blant single bondekarar.
– Det vart mykje respons, kan du seia. Men det var langt frå alt som var av interesse, seier Tonje.
I og med at det er på ein bondegard i naturskjønne omgjevnadar i Ølve vi møter den utflytta ostringen, er det mykje som tyder på at kontaktannonsen fungerte til slutt.
– Det gjorde den, definitivt. Men det var berre så vidt. Eigentleg var Ove Andre litt for seint ute, men det ville seg heldigvis til slutt. Og no er eg her, smiler Yddal.
Jobbjakt
Utan jobb og vener kom ho til Ølve tidleg i januar 2017. Då hadde Ove Andre Ljostveit nett starta som sjølvstendig næringsdrivande heime på garden i bygda. Noko som passa Tonje som hand i hanske.
– Det er jo dette som er draumen. Å bu og driva gard. Men no i starten er det ikkje økonomi til at vi begge kan jobba fulltid, så eg hjelper til med det meste eg vert bedt om å gjera. Elles er eg på jakt etter jobb, og har søkt fleire stadar både i Kvinnherad og kommunane rundt – utan hell, seier ho.
Artikkelen held fram under annonsen.
Trass motbakke i jobbjakta, ser den nyforelska bondejenta ljost på livet.
– Eg flytta hit for kjærleiken, og lev på mange måtar draumen. Det er ei flott bygd der folk verkar imøtekomande og blide. Så eg gler meg stort til fortsettinga, det skal bli kjekt å bli skikkeleg kjent med folk, seier ho.
– Du gler deg til å bli kvinnhering?
– Det blir eg nok aldri. Ein gong ostring alltid ostring, seier no eg. Men kanskje eg kan bli halvt om halvt, for eg er komen for å bli. seier Tonje.
Engasjert
Med seg i bagasjen har ho eit brennande engasjement for politikk og organisasjonsarbeid, og har trass sin låge alder mange ulike verv på samvitet. Før ho flytta til Ølve sat ho i tre år som leiar i Osterøy bondelag og var aktiv senterungdomspolitikar både lokalt og i fylket.
– Ja, du skal ikkje sjå vekk frå at du ser meg i kommunepolitikken etter kvart, og kanskje vert det eit par lesarinnlegg også. Eg er glad i ein sakleg debatt, og i tillegg liker eg å skriva, seier ho.
Artikkelen held fram under annonsen.
Men fyrst handlar det om å bli skikkeleg kjent med sin nye kommune.
– Eg hadde høyrt om Kvinnherad før eg flytta her, men eg trudde blant anna at Ølve og Hatlestrand høyrte til Fusa. I tillegg hadde eg ingen aning om at kommunen var så stor. Det fann eg ut då vi hadde ein rundtur her ei helg. Så eg kan trygt seia at det er ein veldig fin kommune eg no er flytta til, sluttar ho.