«Tide Carrier» er teke i arrest

Miljødirektoratet nektar lasteskipet «Tide Carrier» å leggja frå kai i Gismarvik til dei er heilt sikre på at det ikkje skal til ulovleg opphogging.

Det skriv Miljødirektoratet på sine nettsider tysdag. Lasteskipet, som no har skifta namn til «Harrier», fekk 22. februar motorstopp ved Feistein utanfor Jæren, og vart slept til Gismarvik hamn kor det har lege sidan. Før det låg skipet i opplag i Høylandssundet i over eitt tiår.

Norske myndigheiter meiner å vita at skipet ikkje skal ut av Norge for å leva vidare, men for å hoggast opp i Pakistan. Difor vert det no betrakta som spesialavfall og får av den grunn ikkje gå frå kai.

– Vi meiner det er veldig sannsynleg at «Harrier» var på veg til ulovleg opphogging i Pakistan, seier direktør Ellen Hambro til eiga nettside.

 

Stor risiko

Under tilsyn av skipet vart det avdekka at «Harrier» hadde ein einvegs forsikringspolise frå Høylandsbygd til Gadani, Pakistan, ein stad kjent for å ta imot skip til såkalla «beaching», der skipa går i land på strendene og vert plukka frå kvarandre manuelt - med stor risiko for arbeidaranes liv og helse. Skipet hadde 600 kubikk tungolje og 300 kubikk diesel om bord då det fekk motorstopp.

– Dette skipet både er avfall og har avfall om bord. Det får ikkje segla før vi er sikra at det ikkje går til ulovleg vraking og at avfallet går til forsvarleg behandling, seier Hambro avslutningsvis.