Tid for strandrydding
Våren er ei god tid for strandrydding, men det er også hekketid for fleire av sjøfuglane våre. Difor minnar Statsforvaltaren i Vestland om at ryddedugnaden i område kor fuglar hekkar bør skje før 15. april.
Publisert
For fugle- og dyrelivet er det viktig at naturen er mest mogleg fri for plast. Men i område der fuglar hekkar bør ein ikkje driva med strandrydding i perioden mellom 15. april og til midten av juli. Dette for å hindre at fuglane blir unødig uroa i ruginga.
– Måsar og terner kan gå til skinnangrep for å forsvare egg og ungar, medan tjelden nøyer seg med å varsle høglydt. I slike område bør ein utsetje plastryddinga til hekketida er over, skriv Statsforvaltaren i Vestland.
Annonse
I samråd med naturmangfaldslova har dei lagt ut nokre tips i samband med den nasjonale ryddedugnaden langs kysten. Slik blir dei som deltek i denne merksame på kva omsyn som bør takast under arbeidet, noko som kan hindre at bestandane blir redusert enno meir.
– Dei fleste sjøfuglane på Vestlandet har lenge vore i sterk tilbakegang. Hekkebestandane av dei fleste artar er reduserte med 50 - 70 prosent etter hundreårsskiftet, nokre artar med 90 prosent. Dei bør difor ikkje utsetjast for ytterlegare påkjenningar i hekketida, påpeikar dei.
Statsforvaltaren si sjekkliste for strandrydding
– Ein handlepose med marint avfall kan leverast med restavfallet.
Annonse
– Større mengder bør du ha ein plan for. Snakk med ditt næraste renovasjonsselskap.
– Ta kontakt med ditt lokale friluftsråd for nyttig informasjon om rydding, og for å få tilgang til ryddesekkar, eller sjekk kartet på ryddenorge.no. Det kan vera andre stader ein kan få utlevert utstyr til rydding.
– Hugs å registrere områda som vert rydda på ryddenorge.no, men òg om de kjem over område som bør ryddast.
T-a omsyn til eigen tryggleik.
– La hunden vere heime.
– Ta omsyn til hekkande fuglar, og unngå ryddig i område med sårbart fugleliv mellom 15. april og 15. juli.
Annonse
–Takk for innsatsen med å ta vare på naturen!
