Thorleif har 42 år bak seg i Kvinnheradpolitikken. Torsdag var han heidra med medalje.

77-åringen frå Løfallstrand vart for fyrste gong vald inn i Kvinnherad-politikken i 1975. Utanom eit opphald på tre år, så har politikarveteranen vore med heile vegen. Og Thorleif J. Hellesøy er framleis eit aktivt medlem av kommunestyret i dag.

42 år i politikken

I torsdagens kommunestyremøte vart han overraska med kommunesektorens organisasjon og utviklingspartnar (KS) sin heidersmedalje. Eit heidersbevis som går til folkevalde og tilsette som over tid har utført fortenestefull og samfunnstenleg verksemd av særleg betydning for sin kommune.

– Gode Thorleif. Du har ein rik og lang historie som folkevald i Kvinnherad kommune. Du er og har alltid vore ein samlande person som har fått tillit hos mange valteam. Med imponerande 42 år i Kvinnherad kommunestyre, så er det liten tvil om at du er den representanten med lengst fartstid av alle. Det er med det ei gleda for meg å overrekkja deg KS sin medalje for fortenestefull verksemd i Kvinnherad kommune, sa ordførar Hans Inge Myrvold.

Starta med idretten

Hellesøy, som har ei lang politisk karriere kor han har bidrege lokalt, regionalt og nasjonalt, vart teken på senga av heideren.

– Dette var særdeles uventa. Tusen takk, sa Hellesøy før han held fram:

– Eg melde meg inn i Senterpartiet i 1973 etter å ha fått spørsmål frå Olav L. Nes. Eg møtte han på Skålakaien ein dag i 73, og han bad meg om å vurdera å bli melda meg inn som medlem. Eg, som var veldig interessert i idrett då, spurte om det var noko dei var interesserte i. Og det var dei, og dermed var det gjort. Sånn byrja det, men kor det skal slutta, det får fuglane vita. Tusen takk for merksemda, og takk for at de brukte tid på dette her.