Thea Vaage er Ap sin ordførarkandidat

– Nominasjonsnemnda i Kvinnherad Arbeidarparti er glade og stolte over å få presentera Thea Vaage som vår ordførarkandidat for kommunevalet 2023, skriv nemnda i ei pressemelding.

– Thea er fødd i 1996 og er ein ekte sosialdemokrat med god erfaring frå organisasjonslivet. Thea har mellom anna vore aktiv i AUF, ho har leia valkamparbeidet til Kvinnherad Arbeidarparti og vore fast representant i Kvinnherad kommunestyre, i tillegg til at ho har fartstid frå investeringsutvalet, melder nominasjonsnemnda.

Ordførarkandidaten er utdanna lektor i realfag, og etter nokre år i Oslo-skulen flyttar ho heim til våren.

– Arbeid med unge ligg nært Thea sitt hjarte, og gode oppvekstkår er eitt av dei områda Thea vil via særskilt merksemd. Elles spenner Thea sine politiske interesser breitt, og ho tykkjer alle deler av eit lokalsamfunn er viktige for vekst, utvikling og trivsel. Me som kjenner Thea veit at ho held samarbeid høgt, og har tidlegare uttrykt samskaping som eit favorittord, skriv nominasjonsnemnda til Kvinnherad Ap i pressemeldinga.