Testløp gjekk over all forventing

Over 70 store og små deltakarar var klare for løp eller tur rundt dei tre skogsvatna i Fatlandsskogen søndag. Kjell Rune Asmervik i Fatland Vel tok initiativ til løpet. Han hadde behov for å testa både løyper og kapasitet før Strondaløpet offisielt går av stabelen for første gong 6. april.

Det store kakeløpet

– Sidan me før i tida hadde Strondagampen og Strondaleikane, er det naturleg at dette skal heita Strondaløpet. Då vert det ei tidtakingsavdeling og ei mosjonsavdeling, premie og alt som høyrer til. Men premien i dag er kake! Me har kake nok til at alle kan eta eit stykke for kvar kilometer dei har unnagjort, slo Asmervik fast, framfor ein flokk som likte det dei høyrte.

Alle som har vitja Fatlandsskogen sine arrangement før, veit at gode kaker er ein viktig del av pakka. Me spurte Anna Kaldheim Gjerde kva ho har gjort for å gjera klar til løp, og ho hevda først at ho ikkje hadde gjort noko. Men då me pressa ho litt, kom det:

– Eg har no berre baka og kokt litt kaffi.

Kjell Rune Asmervik passa på å takka Anna og Arne Gjerde som grunneigarar, for at dei stiller eigedomen sin til disposisjon for dette løpet. Før han slapp laus horden med turgåarar og løparar, viste han kart og gjekk gjennom løypene.

– Eg og Leifen gjekk rundt her i fem timar og ti kilometer og merka med ca 400 meter løypeband i går, så det det bør vera greitt å finna fram, kunne han fortelja.

Ny sti rundt Dottatjødno

«Leifen» er altså Leif Hovden, som representerte Halsnøy O-lag. Han heldt styr på alle deltakarane, og sikra seg at alle kom trygt i mål.

Det var tre ulike løypelengder deltakarane kunne velja mellom. Dei minste var nøgde med ein tur rundt Fatlandsvatnet og Kjekavatnet. Ein ny sti rundt Dottatjødno vart offisielt opna denne dagen, og dei som ville rusla eller springa langt, tok også ein tur oppom Hjartestien, med ein ekstra runde rundt Fatlandsvatnet før dei kom i mål.

Det var mange nøgde deltakarar som tok ein prat med Grenda då dei kom i mål. Fabian Ruud fortel at han ofte joggar ute i skogen, og synest det er kjekt at det blir arrangert skogsløp.

– Det er ekstra bra for muskulatur og balanse å jogga i kupert terreng. Ein må berre passa litt på kor ein trakkar, seier han.

Sigvald Robberstad i Halsnøy O-lag var ein sjølvskriven deltakar, og er særs nøgd med innsatsen sin i den mellomlange løypa:

Akkurat dette me ønska oss!

– Det gjekk jamt og trutt, eg brukte omtrent 46 minutt på 5,7 kilometer. 8 minutt per kilometer ute i terrenget, må eg vera nøgd med.

Vegar Robberstad sprang den lange løypa, og kunne fortelja at det var litt sleipt nokre stader.

– På veg ned frå Hjartestien var det så vidt eg heldt meg på beina. Men eg hadde jo han der haren der framfor meg, så eg måtte berre langa ut.

«Haren» han peikar på, er Harald Eide Saghaug, som kom først i mål av dei som sprang den lange løypa. Han var godt nøgd, og det same var arrangøren Kjell Rune Asmervik:

– Det vart nokon titals fleire deltakarar enn eg hadde forventa i dette vêret. Det var akkurat dette me ønska oss!, seier han, med eit velfortent kakestykke i handa.

– Neste gong vert det kakestasjonar ute langs løypa òg, gliser Arne Gjerde.