– Test røykvarslaren 1. desember

I Kvinnherad kommune har det dei siste fem åra vore 25 bygningsbrannar, i tillegg til seks branntilløp. For fleire av desse har røykvarslaren sytt for at folk har kome seg ut av huset i tide.

– Røykvarslaren reddar liv. Test røykvarslarane og bytt batteri ved behov på Røykvarslardagen 1. desember, oppmodar Øyvind Ousdal, leiar for førebyggande i Kvinnherad Brann og redning.

Røykvarslardagen

Røykvarslardagen er eit fleirårig samarbeid mellom Brannvernforeningen, Direktoratet for samfunnssikkerhet og beredskap, det lokale eltilsynet, brannvesenet og Gjensidige.

– Alle kan bli betre til å tenkja branntryggleik. Det viktigaste du kan gjer for branntryggleiken i heimen, er å sjekka at alle røykvarslarane i bustaden verkar som dei skal, og at dei kan høyrast tydeleg på opphaldsrom og soverom, også når døra mellom romma er lukka, seier Øyvind Ousdal.

Alle må ha minst éin røykvarslar i kvar etasje. Røykvarslarar bør testast jamleg, og kvar gong du har vore bortreist over lengre tid. Det klart beste er å ha seriekopla varslarar.

– Levande lys, peiskos, bruk av komfyren og meir bruk av elektrisk utstyr utgjer ein ekstra risiko i jula, særleg i kombinasjon med inntak av alkohol. Gjer det difor til ein hugseregel å teste røykvarslarane og å byte batteri på Røykvarslardagen 1. desember, seier Ousdal.

Han ber huseigarar i Kvinnherad finna ut kva type røykvarslarar dei har, for alle kan ikkje behandlast likt.

– Det er fleire forskjellige typar røykvarslarar. Nokre har ein «test»-knapp som ein kan trykkja på for å sjekka om det kjem pipelyd. Andre har eit brannalarmanlegg som seier i frå automatisk viss ein må byte batteri. Finn ut av kva for ein type du har heime, test røykvarslaren og byt batteri viss det er behov for det, sluttar Øyvind Ousdal.