Terrorrettssak datosett – Hessen tatt av som bistandsadvokat
Dato for rettssaka mot drapsmannen til austrepollingen Kåre Arvid Hesvik, Zaniar Matapour, er sett. Parallelt med at rettssaka nærmar seg, er den lokalt forankra bistandsadvokaten tatt av saka.
Publisert
12. mars opnar saka mot Zaniar Matapour i Oslo tingrett. Han er tiltalt for drapet på 60 år gamle Kåre Arvid Hesvik frå Austrepollen og Jon Erik Isachsen, samt å ha påført skotskadar på ni andre.
Oslo tingrett har sett av tida fram til 16. mai til handsaming av saka i etterkant av terroråtaket i Oslo 25. juni 2022.
Annonse
Det har tatt lang tid før saka har kome opp for retten. Noko av grunnen har vore at påtalemakta har ønska å stilla kjendisterroristen Arfan Bhatti for retten i same sak. Han har vore varetektsfengsla i Pakistan lenge, medan Norge har jobba med ein utvekslingsavtale med Pakistan omtrent like lenge.
15. januar vart det kjent at Bhatti skulle utleverast til Norge, men det var for seint til at han vart tiltalt i same rettssaka som Matapor no blir tiltalt i.
Skifta bistandsadvokat
Per Ivar Hessen var oppnemnd som bistandsadvokat for familien til Kåre Arvid Hesvik, som vart drepen i. No er han effektivisert vekk.
Annonse
– Det er oppnemnd bistandsadvokat for familien til den andre drepne. Tingretten har avgjort at det er unødvendig at to med tilsvarande problemstillingar skal vera utstyrte med forskjellige bistandsadvokatar. Får no same advokat, og det er prosessøkonomiske omsyn som ligg bak. Det er ikkje overraskande at tingretten kom til dette resultatet, meiner Hessen sjølv.
Han fortel at klientane er pålagte å bruka nokon av tingretten sine advokatar.
– Me var seks bistandsadvokatar, men det er no skrelt ned til fire. Det skal vera eit overføringsmøte mellom meg og den nye bistandsadvokaten til familien, slik at klientane får møta han, og slik at den nye advokaten får overlevert mitt arbeid, opplyser Hessen til Grenda.
