Terje og Atle skal til VM i bogeskyting

– Me har vore i troppen i eit par år, og visste at me ville bli med til VM. Ein kan rekna seg til det basert på resultata i stemna som legg grunnlaget. Me har for så vidt toppa dei kategoriane me er med i, men me kunne ikkje ta det for gitt, seier Atle Helland om uttaket.

Koronasjuk

Verdsmeisterskapen blir i år arrangert frå 2. til 10. september i Termi i Italia. Totalt sender Norges Bueskytterforbund 11 til VM. I klassen Compound får Atle Helland med seg éin norsk kollega, medan Norge i klassen Instinktiv, der det blir skote utan anna sikte enn det ein ser langt pila, mønstrar Terje Bakke og to til.

– I utgangspunktet har me blitt tatt ut på forbundet sin rekning, så me slepp å betala noko. Dei som klarer kravet kvalifiserer seg til VM, og kan reisa på eigenhand sjølv om dei ikkje er på landslaget, men me får alt dekka, opplyser Helland.

Nyleg var landslagskameratane på treningsleir i Sverige. Dei skal også gjenta det før VM.

– Det blir mykje trening, og me har skrive under på kontrakt på at me skal trena to timar til dagen. Det kjem til å bli mykje trening på oss no framover. Så det passar dårleg å ha korona no om dagen, smiler Helland tappert.

Pensjonert

Han var med i EM i fjor, og har eit realistisk syn på eigne mogelegheiter.

– Det er meir finsikting i min klasse. I EM i fjor var me 42 som kvalifiserte oss. Vinnaren var 21 år, nr. 2 var 23 år. Eldstemann var over 60 og kom frå Valen, humrar Helland, som nyss pensjonerte seg etter 35 år i nattevaktjobben på Valen.

Han har veldig tru på Terje Bakke.

– Han blei EM-meister i fjor, og dei beste instinktivskyttarane finn ein i Europa. Han tar det seriøst og forskar mykje på dette. Det er no artig og litt stas å vera med. Me har jo lagt tid i det. Det er jysla kjekt å konkurrera. Har så mykje hobbyar at eg ikkje skjønnar at eg har hatt tid til å jobba, melder Atle Helland.

Sjølv har 8-10 dyr heime på forskjellig hald som han trenar på.

– Me er jo seriøse med det me driv med! Det er stas å vera ein liten klubb som oss, og ha to som er tatt ut på landslaget, sluttar han,

Psykologisk spel

Terje Bakke tykkjer også det er stor stas å bli tatt ut til VM.

– Det kom ikkje som eit sjokk, men ei stadfesting på det ein driv på med. Det blir ein sommar med mykje jobbing, men ein må ta seg tid til trening, og vera dedikert når ein er på trening. Ein må finpussa kva einaste dag, og det er den eg må halda ved like, seier Bakke på telefon.

Han er på veg opp til Sogn på jobb, og køyrer innom Bergen og skyt med bogeklubben der før han reiser vidare.

– Eg var på Danish Open i pinsen, og det har ikkje blitt mykje trening etter det. Ein reiser jo til VM for å vera med og kjempa om dei 22 beste etter innleiande rundar, slik at ein blir med blant dei som får skyta om finaleplassar. Ein veit at på ein god dag er ein heilt der oppe. Men det må klaffa dei dagane du er der, elles går det ikkje. Dette er ikkje slik at du hentar medaljar i denne idretten, minner Bakke om.

I fjor gjekk han heilt til topps i EM etter å ha kome på 12. plass i den innleiande skytinga

– Så kom eg i god stim og fekk godkjensla, og lukkast. No veit eg litt meir om kva som ventar. Eg såg på oppvarminga under semifinalen at det var eit psykologisk spel i dette. Eg kom dit som eit ukjent kort for mange, og vann ein mental tvikamp mot andre i dei duellane, fortel 54-åringen.

Bakke tykkjer – som Helland – at det er kjekt at to frå ein liten klubb sånn som Kvinnherad Bogeskyttarklubb får vera med i VM.

– Me har jo lært oss dette sjølve, og aldri hatt trenar, sluttar den regjerande europameisteren.