Teppe til Nepal

Ruth Henriksen og Husnes strikkeklubb har produsert fire store teppe som sherpaane skal ta med til dei jordskjelvråka områda i Nepal.

– Eg kom på ideen då eg såg eit program på fjernsynet om ein strikkeklubb som gjorde noko liknande. Eg tok det vidare til strikkeklubben, og responsen var fantastisk. Alle som ein var veldig glad for å gjera noko meiningsfult med strikkinga, seier Ruth Henriksen.

Etter tre månadar med godt selskap og ivrig strikking har damene no produsert fire pledd på 170 x 90 cm, som veg 1,25 kilo. Og garnet fekk dei levert på døra av Dale fabrikkar.

 

– Fantastisk land

– Det var fantastisk service. Dale sponsa oss med 20 kilo garn, og leverte det til og med på døra. Men det som er rart er at ikkje teppa veg meir, for vi har brukt opp alt garnet, seier Henriksen.

Henriksen, som sjølv besøkte Nepal i 2008, er glad for at sherpaane som arbeider i Kvinnherad har høve til å ta teppa med seg heim til det fjellrike landet.

– Dei brukar tre dagar på å ta seg frå Katmandu til fjellandsbyen dei kjem frå. Og dei kjenner området og veit best kven som har mest bruk for pledda, seier Henriksen og legg til:

– Nepal er eit fantastisk land, eg var så heldig å få oppleva mykje då eg var der nede. Og eg reiste heim med ei innstilling at vi her heime ikkje har noko å klaga over, for vi har det så uendeleg godt her i Norge.