Temakafé for pårørande

«Vi har erfart at det er ei stor påkjenning å vere pårørande til dei som er alvorleg sjuke, og det har lenge vore eit ynskje å ha temakafè der vi set fokus på dette», skriv Astri Måkestad i ei pressemelding.

Randi Værholm kjem for å snakka om temaet. Ho har 30 års røynsle som spesialsjukepleiar frå Kreftforeningen. I løpet av desse åra har ho særleg arbeidd med kreftramma barnefamiliar. Værholm har også leia Kreftforeningens arbeid med barn og unge som pårørande og etterlatne.

I denne omgong vil Værholm i all hovudsak snakka mest om vaksne pårørande. Men Kreftomsorg i Kvinnherad planlegg også ei samling seinare der innhald vil vera meir retta mot barn og unge som pårørande.

«Det vert musikalsk innslag ved Rebekka Attramadal, enkel servering og hyggeleg prat med kjente og ukjente. Velkomen skal du vera», avsluttar Måkestad.