Temadag om kropp: Gav råd til både elevar og foreldre

– Både kroppsfokus og eteforstyrringar er sterkt til stades blant ungdommane og det har fått ein del merksemd i media, så me tenkte me ville ta initiativ til ein temakveld, sa prosjektleiar Gunn Marit Flatland i forkant av temadagen.

Føredragshaldarane ho hadde fått på plass leverte akkurat som bestilt, og forsynte både dag- og kveldsskiftet med opplysande, såre og tankevekkande forteljingar.

Sterke føredrag

På dagen var det ungdomskuleelevane som fekk føredraga, og ikkje mist sunne fiskeburgerar i forkant av føredraga. Foreldre, lærar og trenarar i idrettslaget fekk kveldsføredraga, men med litt mindre sunnare bakst som pauseunderhaldning.

Karen Løvendahl Mogstad brukte av sjølvopplevde erfaringar som mor til jente med eteforstyrringar, og fortalte mellom anna korleis dottera gjorde alt ho kunne for skjula sjukdommen for foreldra. Trass i at Mogstad og ektemannen begge er legar gjekk det tre-fire månader før dei byrja å fatta mistanke om at dottera var sjuk. Mogstad fortalte også om symptom og faresignal til både ungdom og vaksne.

Der fembarnsmora Mogstad kanskje var mest på bølgelengd med dei vaksne, kom Beate Antensrud frå Sunn Idrett ved Olympiatoppen som eit yngre alibi. Hennar hovudbodskap gjekk på kosthald, kvile og trening, og korleis dei tre grovt sagt var like viktige for unge kroppar som både skal fungera og prestera.

– Det er ikkje før du kjem opp på olympisk nivå at kosttilskot og liknande kan ha effekt. For 99 prosent av resten er det rikeleg med det vanlege, var hennar bodskap.

– Stod til forventningane

Rosendal Helselag hadde i stort monn regien på temadagen, saman med Rosendal ungdomskule, Rosendal Turnlag og Uskedalen Helselag.

– Eg syns det gjekk veldig bra. Dei me hadde med oss stilte med velvilje og positiv innstilling. Gunn Marit Flatland gjorde ein kjempejobb som prosjektleiar, og er fagleg sterk i tillegg til engasjert i dette arbeidet, seier Bente Haugen i Rosendal Helselag etter temadagen.

– Eg syns det var matnyttig, konkret og direkte. Det var tydelege føredragshaldarar med mykje på hjarta. Det faglege stod definitivt til forventningane for oss, og det håper me at dei som var til stades også fekk mykje nyttig med seg, seier Haugen vidare.

– Totalt sett trur eg me kan klappa oss på skuldra og seia at me har igjen for arbeidet. Så får me sjå kven og kva me får tak i til neste år, men ambisjonen er å gjera dette årvisst, sluttar helselagsleiaren.