Tek opp utrykkingstider i kommunestyret
I torsdagens kommunestyre vil Wermund Vetrhus stilla spørsmål om utrykkingstidene frå dei ulike brannstasjonane.
Publisert
Spørsmåla kjem som ein følgje av møtet fleire politikarar torsdag kveld hadde med utsendingar frå branntroppen i Uskedalen.
«Eg vil opna med å seia at det er veldig bra at det blir arbeida med ein Risiko- og sårbarheitsanalyse for brann og redning. Å avdekka kvar ein har utfordringar er viktig, særleg når det kjem til beredskap. Og brann og redning er spydspissen av dei som skal passa på oss. Dei er først på skadestaden, dei er der når det brenn og dei har med seg Bjørnis for å trygga ungane våre. Då er det ekstra viktig at vi som arbeidsgjevar gir dei som risikerer liv og lemmer så gode og trygge arbeidsvilkår som mogleg», skriv Wermund Vetrhus.
Annonse
Så viser han til oppslaga i lokalavisene om møtet med branntroppen i Uskedalen.
«Det var ein fin og informativ ettermiddag som eg trur alle sette pris på. Brannmannskapet uttrykka derimot at dei var presentert med nokre urovekkjande moment i arbeidet med ROS-analysen. Det vart nytta tal dei ikkje kjende seg igjen i, og at ein hadde definert utrykkingstid til gjelda for den næraste grensa for ein tettstad», står det i spørsmålet til Vetrhus.
Ligg lengst unna
Han viser så til brann- og redningsvesenforskrifta §2 bokstav i. Der er utrykkingstida definert som: «Tiden det tar fra nødmeldesentralen har utalarmert innsatsstyrken til første innsatsstyrke er på hendelsesstedet».
Annonse
«Altså tida frå alarmen går hos brannmannskapane, til dei parkerer der det brenn. Ein del av utrykkingstida er forspenningstida, den tida det tar for mannskapet å koma seg til stasjonen og ut porten. Den er viktig i vurdering av kven som kan vera med i branntroppen. Forskrifta definerer òg at tettstadar skal ha utrykkingstid som ikkje overskrid 20 minutt. Og det er vanskeleg å tolka dette til noko anna enn at det då gjeld det objektet som ligg lengst unna brannstasjonen», skriv Vetrhus.
Han stiller to konkrete spørsmål til ordføraren.
1. Kva er gjennomsnittleg forspenningstid på dei ulike stasjonane for dei siste 20 hendingane eller dei siste 5 åra, dersom det ikkje har vore så mange hendingar?
2. Kva er kravet til utstyr og talet mannskap for stasjonane, og kva er mannskapet og utstyret på dei ulike stasjonane?
