Tek opp Lundsbakkane i kommunestyret: – Planen har store manglar

Spørsmålet til Helleland lyder slik: Korleis kan kommunestyret på enklast mogeleg måte påverka reguleringsplanen for Lundsbakkane i Dimmelsvik? Han nemner to årsaker for spørsmålet:

* Når ein ser på planen som den no er, så har den etter mi meining store manglar når det gjelder trafikksikkerheit, som er ein av hovudbodskapane med denne planen.

* Eg har personleg prøvd å spela inn forslag om at veg og gang/sykkelveg må skiljast med rekkverk då dette er det mest trafikksikre, men dette ser dessverre ikkje ut for å nå fram til dei som planlegg prosjektet.

Mister kontrollen

Gunnar Helleland trekkjer så fram ei rad argument for å nytta rekkverk i staden for støypekant og grøntareal mellom veg og gang/sykkelveg:

* Rekkverk i staden for grøntareal er mykje sikrare for dei mjuke trafikantane.

* Ein må også ta i betraktning at det er veldig vêrhardt over Lundsbakkane, spesielt med tanke på den sterke vinden som kjem ned Omvikdalen. Dette har ført til at både bilar og folk mister kontrollen over retninga dei har valt.

* Rekkverk tek mindre plass, det vert mindre grunnerverv og mindre nedbygging av dyrka mark, altså mindre kostnader.

* Mindre vedlikehaldskostnader vert det også for fylket som må slå grøntareala i sommarmånadane.

* Mykje mindre moglegheit for vassansamlingar ved støypekantar, som skapar trafikkfarlege situasjonar med tanke på unnamanøvrering og møtande trafikk.

– Reknar med at det er fleire enn meg som har tatt eit ekstra godt tak i barn eller barnebarn når ordføraren eller andre med stor lastebil eller buss passerer deg i bra fart når du går på gangvegen utan rekkverk som skilje mot vegen, skriv Helleland.

Vassdammar

Han trekkjer vidare fram erfaringar frå gang- og sykkelvegen mellom Seimsfoss og Neslia.

– Dei som køyrer på vegen mellom Seimsfoss og Neslia på regntunge dagar, har mest truleg måtte svinga utanom vassdammar og hol som er frest i asfalten ned til dreneringskummane som står i betongkanten mot gang- og sykkelvegen. Det å byggja veg med skilje mot gang/sykkelveg i form av betongkantar, det står for mange trafikkantar fram som ein lite lur måte å byggja veg på, meiner INP-politikaren.